Daily Newspaper

Vairengte-a truck lut turah RAgT tharthawh leh Truck dingkhawm buaipui tham a tling leh țan

12

Aizawl, December 7 : Mizorama bungraw phur lut tur truck khalhtute chu hun engemawchen Covid-19 kai leh kai loh endik loa luhtir an nih hnu ah, kar kalta tawp lam ațang khan sawrkar chuan Vairengte daiah Rapid Antigen Test a ti leh țan a, hei hian truck tam tak a ti tangkhang țan leh mek a, Lailapur thleng an intlar leh tawh. Vairengte khawtlang hruaitute chuan lirthei tangkhang an tam hian ramri-ah Lailapur lamin hma an rawn sawn chhoh lehna remchang a nih an rin thu an sawi.

Thudawn danin, ramria buaina engemaw a awm hma pawh khan, Mizorama lut tur bungraw phur truck khalhtute hi Covid test tih loh reng a ni tawh a. Mizoram Health department-in truck khalhtu ațanga hri kai an hmuh leh hmuh loh pawh hi hun engemawti chhung chu tarlan a awm tawh lo nia sawi a ni.

Tunhnaiah Mizoram sawrkar hian ramria buaina reh hnua Mizo IR-te duty-na (thlang zawk) bulah RAgT sample lak hi a kalpui leh țan a, truck a ti tangkhang tam leh hle a, Lailapur an thleng thla thuak thuak reng tawh nia thu dawn a ni. An bungraw dah zo Mizoram chhuahsan tum leh Mizoram ațanga bungrua phurchhuakte an awm reng bawk avangin lirthei kal vel a tikhaihlak nasa hle nia sawi a ni bawk.

Vairengtea Covid-19 test hmasak zawk khan driver tangkhangte ei leh in tur siama kawngkam thingpui dawr, Lailapur lamin bukte sain an rawn siam nasa a, hmun țhenkhat phei chuan an riahchilh/chenchilh nghal deuh mai nia sawi a ni. Tuna RAgT tih leh avang hian hetiang bawk hi an thleng leh ang tih an hlauh thu khawtlang hruaitute chuan an sawi a. Chumi-in a hrinchhuah leh tur chu, Lailapur lamin an awmhmun an rawn siamrem chho leh anga, ramri bulhnaia buaina bawk awm leh palh thei a ni tih an sawi.

Inrinni khan Mizoram Journalists’ Association Kolasib member-te chuan Vairengte lama ramri leh a chhehvel hi an tlawh a. Vairengte Joint Village Council president R. Lalfamkima chuan RAgT hi nei loin lirthei hi tlang zung zung se a duh thu lo hrilhin, lirthei tangkhang an tam hian driver-te mamawh lamna turin Lailapur lamin kawngkamah dawr an rawn sak leh mai a hlauh thu a sawi. Hei hi ramri issue tichhuak leh thei a ni a, lirthei hi ding khawmuang loin tlang zar zar se an duh tih a lo hrilh a ni.

Kolasib MJA hruaitute sawi danin, Vairengte-a Covid screening neihnaah hian counter pakhat chauh a awm a, helaia duty-te chuan RAgT ti tur hian counter pahnih siam theih a nih laiin counter pahnih siam tur hian darkar 24 chhunga duty turin a tlem berah mi 4 an mamawh a. Mihring an indaih loh avangin test hi a chak thei lo a ni.

Vairengte-ah hian Lailapur bula BSF duty-te pawh MJA hian an tlawh a. BSF-te hi Vairengte-ah an inkulh mek a, Lailapur bulah hian an duty țhin a ni. An duty-na bul lawkah hian Assam-in para military force tho SSB (Sashastra Seema Bal) a dah ve bawk. SSB-te awmna tur ngelnghet taka Assam sawrkarin a siam tawh laiin, BSF awmna tur Vairengte khawtlang hnatlangin hnawhsarum taka an sak chu rin a la ni a, BSF awmna turah hian rualawh a na an tih thu an sawi.

Vairengte SDO(C) chuan MJA-te zawhna chhangin, ramria BSF an duty hnuah Assam sawrkar official-ten ramri hi vawi li an tlawh tawh a. Vairengte vawi hnih, Saihapui V leh Saiphai vawi khat ve ve an tlawh a ni. State pahnih sawrkar inremnaah tunah rih chuan ramri hi official-ten tlawh lo tura inrem a nih thu a sawi.

Kolasib MJA hian Saihapui ‘V’ an tlawh bawk a. Heti lama state pahnih inrinaah BSF an awm bakah Saihapui khawchhungah mipui thlamuan turin 1st IR Bn ‘C’ company an awm a ni IR hotute sawi danin, ramria Assam lam chetdan zawng zawng hi an hmunpui lamah an report zel a, BFS duty-na piah lamah erawh an ni chu an kal thei rih lo a ni.

Saihapui VCP Vanlalzawna’n MJA-te a lo hrilh danin, ramria buaina awm hnuah ramri piah lama ram an neihah, hnathawh kawngah harsatna an nei lo a; sawrkar chuan an khua tihhmasawn chu ngaipawimawh se an duh a ni. “Kan țhenawm lawka Assam lam chanah hian model village-te puangin PMAY hmangin hma an la nasa a, hetiang hmangte hian Mizoram sawrkar hian kan khuaah hma la ve se kan duh hle. Kum hnih-thum vel chu PMAY dawng kan awm tawh lo a, Assam sawrkar zawk hian PMAY hi min pek an tum fo a, Covid leng avanga inkharkhip hnuah pawh PMAY survey rawn neih tum kan lo hnar a ni,” a ti.

Saihapui ‘V’ a BSF duty-te chuan harsatna an tawh loh thu leh boruak a țhat thu an sawi a. An duty chen tur an sawi theih loh thu sawiin, sawrkarin awm tura a tih chen an awm mai dawn tih an sawi. BSF hi chhuak turin sawrkarin ruahmanna a siam a, chhuak turin insiamin lirtheia an inhlan vek hnuah sawrkar hian a thu a sut leh niin an sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy