Daily Newspaper

Vairengte-ah RAT ti zel dawn

34

Vairengte screening point lirtheia Mizorama lutte Rapid Antigen Test tih lai mek, sawrkarin tih tawh loh tura a tih chu tih leh turin hriattirna a tichhuak leh.

Kolasib district bawrhsap Dr H Lalthlangliana chuan chief secretary hnen atangin Vairengte check gate-ah Rapid Antigen Test kalpui chhunzawm a nih tur thu hi an dawng tih a sawi a. Mipui himna tur leh thlamuanna turin sawrkarin ruahmanna a siam thin tih a sawi.

Vairengte check gate-ah hian RAT hi kumin August 10 atanga kalpui tan a ni a, tun thlengin mi 12044 test neihsak tawh niin ram pawn mi lirthei khalhtu leh handyman 11458 leh Mizoram mi 586-te endik tawh an ni. Heng atang hian Covid-19 kai 108 hmuhchhuah a ni tawh.
A thar berah chuan September 3-a Vairengtea RAT hmanga endiknaah bungraw phur lirthei khalhtu mi pahnih chu hri an kai tih hmuhchhuah leh a ni.

September 3, 2020 khan Health secretary chuan hriattirna tichhuakin Assam leh Tripura atanga Mizorama luhna – Vairengte leh Kanhmuna Rapid Antigen Test tih thin chu thu leh awm hma chu titawpin, he hriattirna chhuah ni atang hi chuan thermal screening/ normal screening chiah kalpui tawh turin a ti.

Department thurel hi tha tih lohna thawm a awm nghal avang leh Vairengte kaltlanga lirthei hmanga lut zingah Covid kai hmuh an la awm zel avangin he hriattirna hi thai chhiain RAT hi tih chhunzawm zel tur a nih thu September 4 khan sawrkar chuan hriattirna a tichhuak leh nghal a ni.

Vairengte Covid-19 screening point a duty-te hman tur air cooler pathum chu MJA Kolasib vice president Andrew VL Auva’n Zirtawpni khan bawrhsap hnenah a hlan nghal ai. Heng air cooler-te hi GIG motors neitu John Lalpeka, David Security Solution neitu David Malsawmsanga leh Khiangte Home Appliance, Diakkawn Kolasib neitu Laldinpuia Khiangte ten duty-te hman atana an pek a ni. Heng cooler-te hi Vairengte screening point leh police duty post-a hman tura ruahman a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy