Vairengte College tih puitlinna tur MP-in ngaihtuah pui tum thu hrilh

Vairengte College tih puitlinna tur
MP-in ngaihtuah pui tum thu hrilh
Vairengte College campus-a college lungphum chu Lok Sabha MP Richard Vanlalhmangaiha’n Zirtawpni khan a phum.
Vairengte khaw mipui chu thenawm state nena buaina kan neih changa ral hmatawnga awm thin, a tul huna huaisen em em, khaw mipui inthurual thiam leh zirna sang zawk college an neih theihna tura All NGO, sawrkar hnathawk, political party awm zawng zawng leh kohhran hruaitute an tanrual thiam em em zelna chu fakawm a tih thu MP hian a sawi.
“Sawrkar leh mimal bakah a kohhran ang pawha zirna lam ngaihpawimmawhna kawnga ke kan pente hi hmuh nuam ka ti a. Zirna lama hmasawn leh zirna ngaihpawimawh tlatna rilru hi kan Kristianna nen pawh a inmil hle a ni,” Richard Vanlalhmangaiha hian a ti. Mizoram tan sawrkar laipui sum pawh chhuah theih tur awm ang ang pawhchhuah tumin a zir mek zel tih sawiin, a tul anga college building sakna tur ngaihtuah dan pawh awm tura a ngaih thu a sawi a ni.
College din a nihin a building-ah ringawt a tawk loa, sustainability ngaihtuah tel a ngai a, a thawktu – zirtirtu leh thawktu dang tam tak a ngai dawn tih Lok Sabha MP hian sawiin, “Building nei ngawt ila, thawktu tur kan hmuh zawh si loh chuan building chu a ram mai dawn a ni,” a ti.
Chief minister leh Higher & Technical Education minister te nen ngaihtuah tlangin, Vairengte College tha tak an neih thuai a beisei tih a sawi a. CSR atanga project pakhat an buaipui mek chu a hlawhtling thei a nih chuan a lehpek chu a kal zawt zawt turah ngaiin, chu’ngah chuan college hi ngaihpawimawh leh tihhlawhtlin hmasak tur a ni dawn tih a sawi a ni.