State Legislative Assembly deputy speaker, Kolasib bialtu MLA Lalfamkima chuan Nilaini khan larsap Gen. Vijay Kumar Singh (Retd) hmuin Vairengte atanga Sihhmui panna kawng siamthat leh Kawnpui atanga Aizawl panna kawng zauh chungchang a sawipui.
Deputy speaker hian Vairengte leh Sihhmui inkar kawng chhe zual lai, tui putin a tihchhiat thinte siamthatna atan PQC (cement a chhun) hmang tura NHIDCL-in ‘change of scope’ a siam, Delhi lamin ‘in-principle’ a an lo pawm tawh chu sanction nawrpui turin larsap hi a ngen.
He kawng tui put thin siamthatna tur PQC hman rawtna NHIDCL-in central-a a thehluh hi a taka hna thawh theihnan sanction hmuh a ngai a, fur ruahtui a han ruala working season intan hunah hna tan nghal a nih theihnan sanction nawr chhuah dan a sawipui a. Larsap hian a ngenna hi ngaipawimawhin, karleha Delhi-a a kal hunah hma a lakpui tur thu a hrilh.
Hei bakah hian Kawnpui atanga Durtlang kaltlanga Aizawl panna kawng (tlang kawng) pawh double lane-a siam a nih theihnan central hotute nawrpui turin Kolasib bialtu MLA hian a ngen nghal a. Larsap pawhin Aizawl khawpui luhna leh chhuahna chu kawng pakhat chauh rinchhan loa, kawng hnih tal a awm thei se a duh tih a lo sawi a. He kawng double lane-a siam tura ngenna hi a ngaihpawimawh thu leh theihtawpa a lo bawhzui tur thu a sawi bawk.
Deputy speaker hian kawng siamna tura sanction pawimawh hrang hrang hi a rang lama tifel a, thal intan ruala hna tan nghal thei tura nawr chhuahsak turin larsap hi a ngen a ni.
Vairengte-Sihhmui kawng PQC-a siam rawtna bawhzui sak turin larsap ngen
