Vairengte to Sairang four lane kawng sial turah NHIDCL tih ngai lo ti dawn – Chief minister

Vairengte to Sairang four lane kawng
sial turah NHIDCL tih ngai lo ti dawn
– Chief minister
Vairengte to Sairang inkar four lane sial turah India ram hmun danga an la tih ngai loh nia hriat, a hmun ngaiah compensation inpek ‘double’ a ni dawn tih chief minister Lalduhoma chuan a sawi.
Helaia kawng sial turah hian Forest department chuan forest reserve area a ni, tiin, ram lak a nih dawn chuan an hnena zangnadawmna pek a ngai, tiin, clearance an pe thei lo. Kawng sial tuma an ram laihchhiat sak turten zangnadawmna an phut bawk a, NHIDCL chuan tun thlengin zangnadawmna pe loin, kawng pawh sial a la ni lo. Supreme Court chuan he buaina hi a chinfel dan kawng zawng turin chief secretary kaltlangin Mizoram sawrkar a rawn ti tawh a ni.
He thil hi state sawrkarin chinfel tumin hma a la reng a, a kawng awmchhun nia an hriat chu, Forest department hnenah leh ram neitu inti ve tho te hnena zangnadawmna pek ve ve a ni a. Tunhnaia Delhi-a an zin tumin heti zawng hian sawrkar laipui hotute sawipuiin an ngen ta tawp mai tih chief minister chuan a sawi.
“Forest deparment-in kan ram a ni, an ti a. Ram neituten, thuneituten pass mumal tak an pek (valid pass) nei kan ni a, chhiah pawh kan pe, an ti a. Chu chu a dik tho bawk si. An pahnih hian zangnadawmna min pek sak mai rawh u, kan ti a. Kan nawr chhuak ta a ni. Net present value angin Forest department lam chan tur hi cheng vaibelchhe 90 vel, ram neitute chan tur hi vbch. 1100 vel a ni,” a ti. An han zawh chianin, India ramah hmun inangah mi pahnih hnenah NHIDCL hian zangnadawmna an la pe kawp ngai lo tih a sawi a ni.
Sawrkar laipuiin an lawmman a tumsak, widlife sanctuary-a thawkte chuan mi rualin lawmman an la ve thei thin loa, a chhan ber chu sawrkar laipuiin instalment te tea a rawn pek thin vang leh a rawn thlen tlai thin vang tih Lalduhoma hian a sawi.
Kum khatah 50-50 a instalment hniha siamsak turin an ngen a. Hei hi tih sak an remti a, tunmaia an harsatna phuhruk turin 2nd instalment nuai 152 an sanction sak nghal bawk tih a sawi a ni.