Vaitin mi pahnih tui tla tih finfiah
Aizawl district-a Vatin khaw mi pahnih, luia sangha mana kal, an chin hriat zui tak loh chu luiah hian an chesual a ni tih hriat a ni ta a, pakhat zawk hi Pathianni chhun khan a ruang hmuh a ni.
Thudawn danin, Vaitin pa pahnih – Vanlalhnuaia (40) h/o Lalhmunruati leh Lalditsak (32) h/o Sawmkimi te chu January 8 zing chawi eikham khan Tuiriang luiah sangha man tumin an kal a, tlai chaw tur an ken bak an inkeng lawk loa, tlaiah emaw a tuk zingkar lama haw leh mai tum an ni. Hemi tlai hian in lama awm an chhungte nen an la inbia a, a tuk lamah biakpawh theih an ni tawh lo. Tuiruang luia balu la ten lui kamah an ipte leh sangha man sa mauthei pahniha awm an hmu a, an chhungte hian chawhnu lamah an zu ngaihven a, an chin hriat zui tur a awm lo. Hemi tlai hian an chhungte chuan khawtlang hruaitute an hrilhhre ta a ni.
January 10 khan khawtlang chuan an zawng tan a, tuia chesual an nih theih rualin khawmual lamah pawh ngaihven an ni tho a, tuia chesual an nih takin, tiin, a thlang lamah an lo inrinlawk sa bakah lawng hmangin dap zui a ni. January 12 chawhnu dar 1.45 vel khan pakhat zawk, Lalditsak hi a ruang an rawn langchhuak a ni.
Vaitin khawtlang hruaitute rin danin, an chetsualna hi Tuiruang lui Vaitin kai bula suarah a nih an ring. An pahnih hian tui thiam vak lo ve ve an ni a, an sangha man a lian deuh anga, chumi chaihbuai chuan an chesual ta em ni ang, tih ngaihdan an nei.
Luia chesual an nih takin, tia an chin an lo rinlawk angin, an chetsualna ni awma ngaih theih suar thlang lam, metre 300 velah Lalditsak ruang hi a langchhuak a; Vanlalhnuaia ruang pawh hi an hmuh hma chuan, Mizo danin ni sarih ral hma chu zawn an tum tih khawtlang hruaitute hian an sawi.
Lalditsak hi Parbung Manipur khaw chhuak, Vaitin mi nupui neia inbengbel zui ta a ni a. Vanlalhnuaia hi Tinsuang Manipur lam mi, a nupui nenan Vaitinaa inbengbel ve bawk a ni a. An fate an la buchip ve ve a, ram lama chawhmeh leh lui sa vel dapa eizawng an ni tih sawi a ni.
Hetihlai hian January 7 khan Pualhrang luiah mipa, hnam dang, mi tu tih hriat loh, feet 5.6 vela sang, sam dum, hmuihmul leh khabe hmul nei, a heh chunglam ser, a ban veilamah ‘SS’ tih tatoo nei chhar a ni a, t-shirt dum, a hnuaiah t-shirt nghawng nei (light green color), kekawr bul (navy blue color) ha a ni. Kawnpui Police Station chuan amah hi tunge tih hriat tuma a ngaihven lai mek a ni a, a ruang hi a chhiat deuh tawh avangin district magistrate phalna angin January 8 khan Kawnpui Chhimveng thlanmualah phum a ni. Tun thlengin amah ngaihventu an la awm lo a, amah hria emaw a chhungte biakpawhna awm hria chuan officer -in- charge Kawnpui PS Ph no: 9612177139 emaw Kawnpui PS Ph No: 92339 66362 a hriattir tura ngen an ni.
Vaitin mi pahnih tui tla tih finfiah
