Site icon The Aizawl Post

Valentine’s Day-ah LEHKHABU

February ni 14 a lo thlen dawnin thalai an danglam thin a, a ni-ah phei chuan khawlai te pawh a lun thin. February ni 14 hi Zoramin a uar telh telh a, chu chu khawlaiah pawh a hmuh theih.
Valentine’s Day-ah thil an inpe thin a, rose par leh pangpar chi dang, chocolate, thawmhnaw, gift item hrang hrang a lar thin. Chutiang karah chuan lehkhabu inpe pawh an lo awm a, Valentine’s Day vang hian lehkhabu zuar thenkhat chu an inhralh that phah thin.
Lehkhabu dawr hlun Lianchhungi Book Store chuan February ni 14 hma khan Bible an hralh nual a, hei hi Valentine’s Day atana inpek atana an lei a ni.
Lehkhabu dang pawh an hnena leia inpe an awm a, ngaihzawngte nena kal duna an duhzawng en te an awm. Nutei Book Store pawhin Valentine’s Day thilpek atan hian lehkhabu an hralh; anni hian lehkhabu lei duhte a pe thei a, chutiangah pawh chuan he ni puala lei hi an awm thin tih an sawi.
Kum hnih vel liam ta atang khan social media hmanga lehkhabu zuar an lo chhuak a, social media-a an lehkhabu neih an pholante lo enin miin an duh an thlang thin. Chu chu a zuartute’n an va pe ta thin a, chutiang zuarte pawh Valentine’s Day vang hian an inhralh.
“Lehkhabu lei an tam, an pung a, kan pe kual char char,” Istagram-a lehkhabu zuar Awmawmi chuan a ti a, lehkhabu lei leh inpek hi thalaiin an uar telh telh nia a hriat thu leh an intihhmuh nia a hriat thu te a sawi.
Istagram-a zuar thin Ruatpuia pawhin valentine’s Day vanga an inhralh thu a sawi a, “An tam tia han sawi tur chu a ni lo a, mahse V’Day vang hian kar hmasa lam atangin kan inhralh ve reng,” a ti.
Social media hmanga zuarte hian a leitute duh danin lehkhabu hi an tuam (pack) a, rose par te pawh an duh chuan an thiat thin. A leituteah hian an pek turte hnen thleng nghal se, hre lawk lovin, hnung lama sa barh angin lo dawng se ti an awm thin a, chutiangah chuan thu ziah turte thawnin a zuartute’n an lo ziahsak thin.

Exit mobile version