Valentine’s Day a lo thleng a, ngaihzawng nei ten an hmangaih te nena hun hlimawm taka hman an duh a, chutiang tur chuan nasa takin an lo inbuatsaih a, thilpek an inpe a, kan khawlai leh dawr hrang hrangah hmangaihna lam rimnam thil intar leh zawrh chhuah hmuh tur a tam thin hle. Hetiang hunah hian Valentine’s Day a kawppui nei lo nih chu hrehawm bik riau turah kan ngai a, eng emaw ti takin kan lung te pawh a leng ngei ang. Mahse, tunlai hla lar ho hi, inthenna lam hla, mahni tawk pawha nuam ti takin kan awm theih tih puan chhuahna lam hla a ni thei riau.
Hmanni lawkah Shakira-i’n a ‘ex’ Gerard Pique a kahna hla ‘Bzrp Music Session, Vol 53’ a lar hluaia, chutihrualin chiah hian Miley Cyrus hla thar ‘Flowers’ pawh a lar ngang mai. Miley ‘Flowers’ pawh hi a ‘ex’ Liam Hemsworth pianchamphaah tak an tlangzarh kha a nia, he hla pawh hi a ‘ex’ a tihelna hla a nih leh hmel tlat.
Pangpar te chu min pe lo mah la keimahin ka in lei ve thei; min be lo mah la keimahin darkar daih sawi tur chu ka hre ve tho a, i hriatthiam ve loh sawi tur ka ngah lutuk. Lampui nei lo pawhin keimahin nuamti takin ka lam thei a, ka kut vuantu awm lo mah se keimah ka invuan thei. I hria maw, nangin min hmangaihna aia nasa khan keimah ka inhmangaih thei a sin.
Hetiang deuh hi a ni, Miley ‘Flowers’ thu ken chu. V’Day-ah ‘single’ mah la hrehawm tihna tur a awm lo, mahni induatna hun atan hmang jeih rawh le. I duh leh spa-ah te kal la, midang present pek ai kha nangmah inpe hlauh rawh. Ngaihzawng te veng thawng reng reng a nun chep ru tak, mahni duh ang pawha awm that theih loh nun kha i nei ve dawn lo. I zalen a, mitmei ven tur awm hauh lovin i nuam tih dan ang berin i awm thei zawk asin.