Site icon The Aizawl Post

Valentine’s Day Pualin THISEN HLU

By H.Lalroluahpuia

Ni, 14.02.2023: “Inhmangaihte Ni” hi engtin nge kan hman dâwn le? Hmangaih nei tawh phawt chuan kan hmangaihte tân, ‘a tha ber’ pêk theuh kan duh vekin a rinawm. Chutiang zêlin hmangaih pawhin hmangaihtu hmangaihna a chhâng let ve ngei bawk ang chu…

Mihring hi tumah mahnia damkhawchhuah theih a ni lo! Inmamawh tlâng vek leh a huhova khawsa tûra Siamtu duan kan ni. Chutiang chuan hmangaihnain mipa leh hmeichhia chu min phuarin min suihfin a, la inhre ngai reng reng lote pawh pumkhatah min siam ta thîn a nih hi. Mipa leh hmeichhia pawh hi in mamawhna nei lo, mahnia ding thei ve ve chu ni ila, pumkhata siam kan ngai lovang. Mamawhtu kan nih erawh a va chiang si em!

Mizo thu lár, “Lungpui pawh lungtein a kam kî loh chuan a awm thei lo,” tih hian hringnun hi a hrilhfiah chiang hle. Mi dang mamawhna nei meuh lova kan inhria a nih chuan leilung dân hi kan bosal nasa hle tawh tihna a ni ngei ang. Chutiang taka in mamawh tawn a; harsatna hrang hranga inpui tlâng a, inphuhrûka, mi dangte tâna malsâwmna nih hi Siamtu lâwm zâwng a ni. Mi dangte tâna thil tha tih hi mahni tâna hna tha thawk nihna a ni; mi dang mamawhtu vek kan ni si a!

Kan entawn tûrin Isua’n amah ngei a rawn pholang a. Kristian kan nih ang pawhin kan entawn ber a ni tûr a ni reng a. Hmangaihna avângin a thisen hlu tak a luang a. Misual boral tûr, chatuana hrem hmabâkte min tlan chhuak a. Tihdama awmin nunna kan lo nei ve leh thei ta… A va lâwmawm em! Engkim hi hmangaihna vâng chauh a ni e! A hniaka kan zui ve theihna kawng pakhat chu nun thlahlel ngawih ngawih, an taksa chakna, hrisêlna leh an thisen neihin nunna a pêk zawh tawh lohte chhanchhuah hi a ni ve dâwn lo’m ni?

I hmangaih tâna thil hlu leh lâwmawm tak hriatreng tlâk i tih mêk lai khân, mahni khum laizâwla thih leh dam sual mêk, chumi hmun atanga hmangaihtu mamawh êm êm, an tâna inseng so a, an neih hlu ber hlân theitu mamawh tak tak an va tam si em!

Thisen hi Chungnungbera kut chhuak khawvêl thiamna sâng leh ropui tak tak te pawhin a siam ve theih loh a ni. Thisen tel lovin mihring nunna lah a awm thei bîk hek lo. A va hlu em! Chu lo liama hlu hmanga mi dangte tâna thil ?ha tih duh lo tu nge awm thei ang le? Hmangaihna bawk a ngai a nih chu… Lainata hmangaihtu hmêl hmuh beisei a, an mit la meng hrâm hrâmte tâna hmangaihna dik pêk chu hmangaihtu leh hmangaihte tâna thil tha tihna remchâng a va ni dâwn tehlul em!

Kan hmangaih leh min hmangaihtu pawh chu tupawh lo ni sela; chu hmangaihna zâwka chu a mamawhtute tân malsâwmnaah kan chantîr ve thei dâwn lo’m ni? Thisen pein, mi dangte tân malsâwmna nih i tum theuh ang u… Hei hi Valentine’s Day hman dân duhawm ber lo ni zêl teh se…

Exit mobile version