Site icon The Aizawl Post

Valentine’s Day pualin thisen unit 1032 pe

Association for Voluntary Blood Donation (AVBD), Mizoram State AIDS Control Society (MSACS) leh Blood Bank tangho chuan February 14 khan Mizoram hmun hrang hrangah Valentine’s Day pualin a thlawna thisen pek runpui an huaihawt a, thisen unit 1032 pek a ni.
Valentine’s Day Blood Donation Camp 2023 hi Mizorama blood bank 11-ah neih a ni a; Aizawlah chuan AVBD, MSACS leh Civil Hospital Blood Bank-ten huaihawtin, Music Domain Mizoram-in an pui a, zaithiam thahnem tak an zai bakah thisen pek chungchang leh HIV/AIDS chungchangah inzirtir a ni. Aizawlah hian mipa 166 leh hmeichhia 66-ten thisen unit 232 an pe.
Aizawla thisen pek runpui hi Health & Family Welfare minister Dr R Lalthangliana’n a tlawh a. Thalaiten an ngaihhlut em em Valentine’s Day chu midang tana malsawmna nihna remchang atan hmang a, thisen pek runpui huaihawt a ni chu he Ni hman dan tha ber pawl nia a hriat thu a sawi.
“Thisen mamawhtu hi an awm reng a, Mizo thalaite mi nunna chhan tura thisen pek uar zel turin ka sawm a ni,” a ti a. Thisen an pek zel theihna’n nun uluk turin a chah bawk.
MSACS atangin HIV/AIDS chungchanga hriat tur leh invenna tura pawimawhte inzirtir a ni a, AVBD secretary (Publicity) K Zothanpara’n V-Day puala thisen pek dinhmun tlangpui leh tum khata thisen tam tak pek aia thisen pek ngun a that zawk dante a sawi.
AVBD president C Lalnunnema chuan V-Day puala thisen pek runpui huaihawta thisen petu zawng zawng chungah lawmthu a sawi bakah he Ni hlawhtling taka an hman theihna tura tha thawhtute chungah lawmthu a sawi bawk.
Valentine’s Day-a thisen pek hi kum 2010 khan Mizoramah kalpui tan a ni a, kum 2010 atanga kumin thlengin thisen unit 9772 pek a ni tawh.

Valentine’s Day 2023 puala thisen pek zat
1. Aizawl Civil Hospital – 232
2. Synod Hospital – 200
3. ZMC – 100
4. Lunglei – 150
5. Siaha – 94
6. Champhai – 93
7. Kolasib – 73
8. Serchhip – 11
9. Lawngtlai – 60
10. Mamit – 19
TOTAL – 1032

Exit mobile version