Daily Newspaper

Vawi 4 endik hnua hri Covid kai hmuhchhuah pahnih awm

13

Mizoram Police mi, Bihar inthlanpuia duty-a kal, an rawn haw hnua Rapid Antigen Test leh TrueNat PCR hmanga tum li (4) endik tawh, Covid-19 an kai tih hmuhchhuah loh zing ami, khunghranna hmun an chhuahsan hnua endik lehnaah hri an kai tih hmuhchhuah pahnih an awm. An ni hi December 7 zinga result chhuaka Mizorama hri kai hmuhchhuah awmchhun an ni.

Mizoram sawrkar report danin, December 6-a sample endik, December 7 zinga result tihchhuahah ZMC RT-PCR laboratory chu Pathianni hian khar a nih avangin sample endik a awm loa, district hrang hrang TrueNAT laboratory-a sample 14 endikah hri kai hmuhchhuah an awm lo. Rapid Antigen Test hmangin 627 endik an ni a, hri kai hmuh thar pahnih an awm. RAgT endik a pun hluai chhan hi, Vairengtea bungraw phur truck khalhtute endik leh tan tawh vang nia ngaih a ni.

RAgT hmanga endik zinga hri kai hmuhchhuah takte hi Thenzawla Police Training School-a awm lai, Mizoram Police an ni a. Bihar inthlanpuia duty-a kal rawn haw, tum li lai sample endik hnua hri an kai tih hmuhchhuah loh (negative vek) an ni a, quarantine center atanga chhuahtir, an chhuah hnua hri an kai tih hmuhchhuah tak te an ni. An ni hi Thenzawl khua bikah tualchhunga Covid-19 kai hmuhchhuah hmasak ber an ni a, contact tracing neih zui nghal a ni.

Thenzawla Vantawng chanchinbu editor Liantluanga Renthlei hnen atanga thudawn danin, hri kai hmuhchhuahte hi Police Traning School (PTS) a awm, Thenzawl khawchhunga chhungkuaa khawsa niin, Bihar inthlana duty-a kal mi 61 zinga tel an ni. Bihar atanga an rawn haw thlen ni, November 12 atangin fimkhur thuhlaah PTS Thenzawla khunghran nghal char char an ni. An thlen hlim leh quarantine an nih chhung hian RAgT tum khat, TrueNAT hmangin tum thum hri an kai leh kai loh enfiah an ni a, hri hi an kai tih hmuh a ni lo. PTS Quarantine Centre-ah hian tunhnai khan hri kai enkawl dam, RAgT-a negative chu Serchhip CCC atanga a chhuah hnuin a boral a, a boral hnuah Covid-19 hri a kai tih test atanga a finfiah a nih leh avangin, tuna hri kai hmuhchhuahte pawh hi ni 16 chhung khunghran an ni a. Test tum 4 an fihlim hnu, ni 16 chhung PTS Quarantine Centre-a an awm hnu in, November 28 khan an chhuak a, in lamah an haw a ni. Hemi hnu kar khatna vel, December 6 khan pakhat zawk hian Covid-19 symptoms a neih avangin Thenzawl CHCMedical Team-in RAgT hmangin an enfiah a, hri a kai tih finfiah niin, khunghranna hmuna a awmpui pawh a sample endik a ni a, a ni pawh hian hri a kai tih finfiah a ni.

Hetiang a nih avang hian December 6 (Pathianni) atang khan Thenzawl CHC Medical Team leh Thenzawl Town Task Force chuan ngawrh takin contact tracing tiin, hri kai hmuhchhuah tak chenpuite chu TrueNAT hmangin endik an ni a, an result hi hriat theih thuai beisei a ni. Hri kaite tlawhpawh hnai zual nia hriat chhungkaw 12 chu home quarantine-a dah nghal niin, an zingah hian hri kai hmuhchhuah tak kalna, Thenzawla Mizoram Rural Bank thawktute pawh an tel a, MRB hi khar rih a ni.

Mizoramah Covid-19 kai leh kai loh sample lak 157292 an awm tawh a, heng zinga 3936 chuan hri an kai tih hmuhchhuah tawh niin, sample lak atanga hri kai hmuhchhuah hi za zelah 2.50 an ni. December 7 khan hri kai enkawl dam tawha ngaih, enkawl hmun atanga chhuahtir mi 28 an awm a, heti hian dama chhuak tawh hi 3756 niin, enkawl mek 174 an awm. Covid vanga thi nia chhinchhiah hi mi 6 an ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy