Mahmuaka Chhakchhuak
Mizoram Legislative Assembly-in Mizoram Youth Commission Act 2008 a duan chhuahah chuan Mizo thalaite tan ke pen chhoh tumin zirna kawngah emaw hnathawhna kawngah emaw kawng hrang hrangah thalaite tana hmalaksak turin bul tan chhoh a tum a. Oct. 13, 2008 chuan khatih laia Chief Minister, Zoramthanga chuan MYC office hi a hawng a, hmabak eng tak neiin ke a pen chho zel a, kum 2023 velah phei chuan IAS satliah lo tak ‘Super IAS’ programme hial kalpui a ni.
Amaherawhchu MYC kan lo kalpui thin tawh danah khan kumtina beiseina sang tak nen kan thlir reng laiin beisei a pha thin meuh lo a, Civil services Exam-ah te pawh chuan Mizo thalai tling kan awm thei ngai meuh lo a, thenkhatte’n India rama Youth Commission nei hmasa ber kan ni an tih laiin rahchhuah lawh tur a tam thin lo hle. Chutih rual chuan Zaithiam leh Miss lamah erawh Mizo thalaite chu vawiin thlengin kan la intodelh ang reng viau thung.
Eng pawlah pawh hian a ngaihna hria hruaitu an awm hi chuan pawlin hma a sawn mai thin a, hruaitu mawhphurhna hi dinhmun lamah thlir tur a ni chiah loin an hnathawhah hian thlir tur a lo nih zawk zia vawiina MYC ah hian fiah takin kan hre thei awm e. Hruaitu hmasate kan demna lam nilo sela, kum 2024-a hruaitu thar an neih atangin Mizo thalai 500 chuangin hna an nei hi thil lawmawm tak a ni a, chumi tura a kalkawng an ruahman dante hi a ngaihnawm viau mai bawk a, tunah chuan MYC hmalakna leh hnathawhte chu kan ngaihven tan ta hle.
MYC hnathawh hrang hrangte hi hre vek lo mah ila, vawiina kan hmuh leh hriat chin ngawt pawh hi puanzar chakawm tak a ni a. Nakin zel atan pawh chhinchhiah tlak tak tur a ni kan ti thei bawk awm e. UPSC exam-a Mizo thalai tling hleithei ta lo pawh veina lian tak neiin kum kal tawh lamah pawh lo buaipui a niin Alternative Learning System (ALS), New Delhi nena inremna ziak a thawkhoa UPSC Civil Services Online Coaching kalpui nana Very Small Aperture terminal (VSAT) satellite khawl buna Mizoram hmun hrang hrang atanga zirlai 325 te tana coching kalpui nan chuan kum 2016-17 chhungin Rs. 1,10,00,000 zet sen ral a lo ni tawh a. Amaherawhchu IAS kan neih belh ta chuang lo a, IPS leh IFS te pawh kan neih belh ta chuang lo ni awm tak a ni.
Vawiina MYC-ah erawh chuan hmasawnna hmel kan hmuin, kan thalai pakhat Andy L. Khobung chuan UPSC CDS exam-ah inziak tlingin Officer Training Academy, Chennai-ah a tranning ang a, chumi hnuah chuan Lieutenant-in bul a tan dawn a ni. MCS Combined exam coching class pawh hmun dang aia fee tlawm zawkin kalpui a ni a, rah tha tak a chhuah ngei turah ngai ila. Heng bakah hian Group B&C coaching class pawh kalpui a ni a, Aizawl mai bakah Lunglei, Kolasib, Champhai leh Siahaah te pawh kalpui a ni. Kum 2024-25 chhung khan coaching class zirlai 33-te chuan sorkar hnaah an inziak tling a, kum 2025-26 ah pawh mi 66-te chuan sorkar hnaah an inziak tling bawk.
Heng bakah hian Hotel management lamahte, Spa Therapist, British Army-ah te pawh Mizo thalaite tan kawng an sial zelin hmalakna an nei a. Bristish Army hi han sawi zau lawk ila: Bristish Army-a Mizo tlangval lo tang tawhte nen sawihona an neiin thawhho dan tur kawng an dap a, mimal firm atanga Bristish Army-a tang duh tan sum leh pai senga tihpui dan tur a awm a, Mizo thalaite ngei pawh an lo hlawhtlinpui tawh bawk nghe nghe. Amaherawhchu sum leh pai sen tam deuh alo ngaih avangin mi nazawng tan alo harsat theih avangin MYC chuan pawisa engmah sen ngai loin an buaipui a, kum hmasa (2024) August thlaah online-a dil theihna an hawngin chung dilna atang chuan Mizo thalai 247 laite chu Bristish Army-a an luh theihna turin an tanpui a. Heng zinga mi pangate chuan kohna an dawngin March 2025 khan England an pan a, fiahna leh tehna hrang hrang an paltlangin an hlawhtling chho a, a lawmawm hle.
Heng bakah hian Mizote’n kan tlakchhiatna leh tan kan lakna tur langsar tak Lehkhabu chhiar lamah hma la tharin lehkha chhiar tam inzirtirna turin MYC Book Club an duang a. April 11, 2025 khan a hawnna hun an lo hmang tawhin vawiin thleng hian kalpui zel ala ni. Taiwan sorkar nen India-Taiwan Labor Mibility Agrement 2024 hnuaiah thawhhona an siam a. Tunah hian Mizo nula pakhat chuan Taiwan-ah Taiwan sorkar chawmin mandarin (Chinese tawng) tawng a zir mek a, a zir chhuah hunah MYC Office ah Chinese tawng zirna hawn tum a ni bawk. Chutianga tawng an thiam hnuah chuan an ramah hnathawk turin an intir leh dawn a ni.
Sawi hmaih theih loh tur pakhat la awm leh chu Mizo Territorial Army chungchangah hian MYC chuan tha a thawh nasa em em a, November ni 15 – 25, 2025 ah RG Stadium, Mualpuiah lak a ni a. Hetah hian MYC chuan Mizo thlaite tan zingkarah tui leh ORS a thlawnin a sem a, puih an ngaihna apiangah a pui bawk. Tlan leh medical bakah test hrang hrang paltlangte tan December ni 1 – 19, 2025 inkar chhungin Written Exam Crash Course a buatsaih sak leh a. Written exam hi ni 18 January, 2026 ah Pachhunga University College-ah neih a ni bawk a, heng atang hian mi 144 (Mipa 135 & hmeichhia 9) te chu batch hmasa ber atan lak an ni a, May 11, 2026 khan Chief Minister-in Shillong lama training nei turin a vailiam a. Hetianga Mizo Territorial Army kan nei chho tan ta hi Mizo chanchina thil chhinchhiah tlak tak a ni ngei ang.
Heng bak pawh hi MYC hnathawh leh hmalakna sawi tur ala tam a, chipchiar tak chuan sawi tawh lo mai ila. MYC hian kum 2008-a a din tirh atangin zawi muangin hma a sawn chho zel a, a ngaihna hria hruaitu an neih leh neih loh a zirin an hmasawn dan hi a kal muangin a kal chak tiin sawi ila a dik mai awm e. Hun kal tawh lam chanchin chhuina kan nei lem lo nain tun sorkar tharah hian MYC kaltangin Mizo thalai 544 te chuan hna an hmu tawh tih hriat hian MYC hian hna pawimawh tak an thawk a ni tih a hrilhfiah theiin a rinawm.
Lehkha thiam hna hmu lo tih tawngkam hi kum tam tak liam tawh atanga kan lo sawi fo tawh a ni a, hetianga mithiam hna hmu lo tam tak kan neih te hi asset ang zawnga ngaih tur nge ni a, liability anga ngaih tur ni ang tih pawh sawiho tham a tling hial awm e. Hei hi a chhan ni bera lang chu Mizoram pawna hnathawh kan hreh vang a ni thei ang. Tun hma deuhah khan Khasi ho chuan Nongpoh bak an pel ngam lo an ti thin a, chutiang deuh chuan Mizo ho pawh tunhma lamah chuan Mizoram pawna lehkha zir leh hnathawk hi mi tlemte chauh an ni. Tunah erawh chuan MYC kaltlangin a ni emaw kawng dang atangte pawhin a ni ang a, Mizoram pawna hnathawh hi kan zuam ta viauin a hriat a, a lawmawm. Hetianga ram pawna hnathawh hi kan intihhmuh zel a tha a, Mizoram chhungah hian hnathawh tur kan nei vek thei dawn lo tih hi kan hriat a tha.
Vawiina MYC hnathawh leh hmalakna chhuanawm tak takte hriat hi a lawmawm a, thawktute tanrualna vanga tun hun thleng thei an nih avangin theihtawp chhuahin thawktute pawh tang zel rawh se.