Vawithum tlawm zawn pumpelh City
Premier League champion Manchester City kechheh a buai zawk a, an league game hnuhnung pahnihah tlawmin, Inrinni zanah erawh hnehna an changlet leh ta hram a, an mikhual Brighton & Hove Albion laka 2-1 hnehna nen table-ah a ler an luah chho leh.
Etihad Stadium inkhelah hian inrintawkna neilet leh tur pawha chak mamawh City hian tan atanga minute sarihna lekah goal hmahruai khungin, Julian Alvarez chuan Brighton keeper Jason Steele-a dan zawh loh tawh chiahin Jeremy Doku ball chhawpsak chu goal-ah a chantir.
Minute 20 khelh tlin dawnah an goal machine Erling Haaland hun a herchhuak a, he Norway international palian hian nghet zawka mualneitu team hmahruai-na goal thawhin, Brighton bei-letin minute 73-ah Ansu Fati goal hmangin an siphurh pakhat zawk sut then bawk mah se tuntum chu Etihad club-in hnehna an lawm zui thei ta tho!
Tarlan tak angin, Pep Guar-diola team hi Inrinni hma chiaha an top-flight match khelh hnuhnung pahnihah tlawmin, kut berng ve vein Wolves leh Arsenal khelmual an chhuahsan kha a ni a, Spaniard coach hnuaia a vawikhatna atan league-ah vawithum an tlawm zawn tling dawn em tih fans lamin an thlir mek laiin chu record chhia chu an pumpelh thei hram a ni.
Defending champion hian hun pekbelh minute ngana a kal mek laiin an player pakhat Manuel Akanji chu red card avangin an chan a, Ansu Fati goal thunna kawnga a tihsual langsar Akanji red card vanga a kim loa khel City hian a tlem zawk nihna an tuar hman ta lo hlauh a ni.
Liverpool 2-0 Everton
Tunhnaia an Arab-pui Palestinian-te thlavang hauha mihring damkhawchhuahna aupuitu Mohamed Salah goal hnih tihluh hmangin Inrinni zan Merseyside derby-ah Reds an chak a; Anfield inkhela an point thum hlawhchhuah hmangin Premier League table-ah pa-thumna an luah chho.
Mualneitu team chakna goal hnih thawhtu Salah hian a career pumpuiah game 200 a khelh tlinna chiah niin, tah chuan league goal 201 a khung tling chiah a, match tina goal khat zel aia tha hret tilut zel ang a ni.
Egypt striker Mohamed Salah-a goal hmasa zawk hi second half penalty atanga a chhuihluh niin, Kop End lama penalty hi Michael Keane-a handball hrinchhuah atangin hlauthawng reng renga Liverpool fans-in minute 75 chhung hun an hman chu Salah goal hian a titawp ta a ni.
Hun pekbelh minute sarihna a kal mek laiin Salah hian a goal hnihna leh chiang zawka Reds chakna goal thawh lehin, he result hmang hian Premier League table-ah hma an hruai hman zawk a, Inrinni inkhel hnuhnung lama Manchester City an chak avangin Anfield club hmahruaina hian an daih rei ta lo mai pawh a!
Jurgen Klopp-a team chakna chhan pakhat tih loh theih loh chu first half minute 37-na leka Everton full-back Ashley Young hnawhchhuah kha niin, Watford tana a khelh laia winger anga an lo chhawr tawh Young hi yellow card vawihnih hmuh vanga red card hmanga vawm zui tak a ni.
He derby-ah hian England international Jordan Lee Pickford chuan goal hnih chhuah mah se Everton goal-ah an lama lut tur a dang thla nual a, Alexis Mac Allister, Darwin Nunez, Trent Alexander-Arnold leh Dominik Szoboszlai-te ball hlauhawm fu fu kha dangchat lo se chiang zawkin Liverpool an chak ngei ang.
Vawithum tlawm zawn pumpelh City
