Vawk 4600 chuang chan tawh

African Swine Fever (ASF) vangin hmun hrang hrangah vawk a thi a, kuminah he hri vang hian Mizoramin vawk 4600 chuang a chan tawh.
AH&Vety department-in an chhinchhiah danin, June ni 22 thleng khan kuminah ASF vangin vawk 3233 a thi tawh a, he hri vang hian vawk 1415 tihhlum/suat a ni tawh bawk. Vawk thi tawh zawng zawng hi 4648 a ni.
Kumina ASF vanga vawk thi hmasa ber chu Aizawl district-a mi a ni a, January ni 16-a mi a ni. District pasarihah a darh tawh a, Aizawl, Serchhip, Saitual, Lawngtlai, Mamit, Kolasib leh Khawzawl district-ahte he hri hi finfiah a ni tawh.
AH&Vety department chhinchhiahnaa a lan danin, ASF vanga vawk chan hi chhungkaw 1103 an ni tawh a, district pasariha khaw 80-ah hri hi finfiah a ni tawh. A district zawnga sawiin a darh zau a, mahse a khua ang zawnga chhut chuan chuti lutuka tam chu a ni lo.
Kumina tuar nasa ber chu Aizawl district a ni a, vawk 1851 a thih bakah 738 tihhlum a ni tawh. Serchhip district-ah vawk 958 a thi tawh a, 651 tihhlum a ni tawh.
Mizoramah ASF hi 2021-ah finfiah a ni a, chumi hnuah chuan kum tin a la leng. Nikum khan vawk 9711 a thi a, 3620 tihhlum a ni.