April 25 khan Muallungthu leh Tachhip inkara ‘Zuanbak luiah’ vawk thi paih hmuh a nih thu report a ni a. Samtlang leh Lungleng inkarah pawh kawngthlanga vawk thi paih a nih thu report a ni a. Hengte hi AH&Vety department chuan a dik tih an finfiah.
April 27 thlenga AH & Vety department chhinchhiah danin, ASF avang hian kumin chhungin Mizoramah vawk thi 285 a awm tawh a, ASF hri kai nia ngaih tih hlum 95 a awm tawh bawk. ASF hian district panga a tuam tawh a, Aizawla ASF lenna Salem Veng leh Kulikawnah vawk a la thih belh reng a, he veng pahnih hi kar kalta lam atang khan ‘infected area’ a puan an ni tawh a. Saitual leh Khawzawl district-a Dulte khuaah pawh vawk a la thih belh reng bawk.
Kan hriat angin kum 2021 khan ASF avangin Mizoramin chhiatna nasa tak kan tawk a. Khami tum khan ASF vanga vawk thi kha 29,824 niin vawk suat ringawt pawh 10,381 a tling a. A kum leh 2022 pawh khan, ASF vanga vawk thi chu 600 chuang niin 100 vel suat a ni leh bawk.
Khati khawp khan ASF khan min nuai a, tawrhna leh channa nasa tak a thleng a, kuminah pawh vawk zathum dawn ASF avangin an thi leh tawh chu a ni a. Hetih laia ‘Vawk thi paih’ tih thawm hriattur a han awm leh, ‘infected area’-a vawk dam lo talha zawrh report a han lut leh ta mai hi, a pawiin a huatthlala hle mai a. Sum duh luat avanga ram pumin a tawrh phah theihna tur tih hre reng chunga ti lui duh an la awm thin hi, tun hnua a awm leh tawh lohna turin a na thei ang bera action lak hi a tul tawh niin a lang.
Infected area-ah vawk damlo talha zawrh a ni thei hi, ran talh kawnga safety measure kalpui uluk a pawimawhzia a lo lang. Mipuiin sa thianghlim an ei theihna turin meat inspector ten slaughter house atanga ran talh chu a thianghlim ngei a ni tih finfiahna ‘certificate’ an pechhuak thin a. Hetih lai hian, slaughter house hmang lo ran talhtu hi 80% aiin an tam a rinawm a, hei hi eng tin emawa chinfel dan ngaihtuah a pawimawh ta hle. Chuti a nih loh a, a hman hmanin ran an talh a, ran damlo te pawh an zawrh duh zel chuan, thil danga hrisellohna kan ngah tawh tehlul nen, natna belh chhah thei zawnga ei kan zawng suau suau mai a nih chuan, kan hmabak hi a thim hle dawn a; sawrkar lam tang se, khawtlang hruaitute pawhin sawrkar thawhpui dan zawng bawk se, tanrual a ngai a nih hi.
Vawk thi paih…
