Vawksa frozen lakluh khap danah
sawrkar leh MiPFA HC-a khin tum
Vawksa leh vawksa atanga thil siam frozen lakluh khapsak an nih chungchangah state sawrkar leh Mizoram Pig Farmers Association (MIPFA) chu Gauhati High Court-a khin tum an ni.
Vawksa leh vawksa atanga thil siam frozen Mizorama laluttu, Star Farm neitu Malsawmi sawi danin, African Swine Fever lenna ni lo atangin vawksa hi an lalut a, document pawh fel tak an nei chungin, Aizawl district bawrhsap chuan a khapsak a, a thupek zawm loa a puhnaah police station-ah FIR thehlutin, court-in hemi chungchang a ngaihtuahnaah ngaihtuah zui zel ngai loa ngaiin a titawp tih a sawi.
Sawrkar laipuia Ministry of Fisheries, Animal Husbandry and Dairying-in National Action Plan (NAP) for ASF a siam chu a nih angin Mizoramah kalpui a ni loa, duh duh lai zawmin duh loh lai an zawm lo mai nia a lan thu Malsawmi hian a sawi a. Hei hi RTI hmanga Aizawl bawrhsap an zawhnaah vawksa frozen lakluh khap hi Mizoram AH & Vety department thurawn anga thupek anga chhuah nia a insawi laiin, AH & Vety lam an zawhnaah chuan an hriatpui lo niin an sawi ve thung si niin a sawi bawk.
State dang atanga vawksa frozen lakluh chungchangah NAP for ASP zawm ni anga sawrkar a insawi laiin, ASF vanga vawk thi leh suat chungchangah NAP-in tih tur a tih ang chu zawm a ni vek lem leh si lo tih sawiin, NAP mai ni loin India danpui kalhin sumdawnna chungchangah hleih nei takin midang sumdawnna tichhe thei zawngin hma lak nia an ngaih thu a sawi a ni.
Star Farm chuan vawksa an lakluh hi India sawrkarin ASF len lohna hmun a tih atang vek niin, ASF lenna (infected area) atangin a phurhchhuah theih loh a, chu chu state tin paltlang tura checking neihah an phawrh ngei ngei a ngai a, Mizoram ai mahin state dangah chuan an uluk zawk nghe nghe tih a sawi a ni.
Vawksa frozen lakluh khap danah sawrkar leh MiPFA HC-a khin tum
