Viksit Bharat – Guarantee for Rozgar & Ajeevika Mission (Gramin) Act, (VB-G RAM G), 2025 chu Nilaini atang khan hman tan a ni ta a, sorkar laipui chuan a kalpui dan tur ruahmanna tul zawng zawng tihfel vek a ni tih a puang.
Rural development ministry chuan he dan hian thingtlang chhungkaw tinte tan ni 125 thleng inhlawh theihna tur a siam a ni tih sawi a, hei hian tuna thingtlanga ni 100 inhlawhna kalpui mek chu a thlak dawn tih an sawi.
State leh union territory (UT)-te hnenah kalphung thlakna mumal taka kalpui a nih theih nan, a hun taka hlawh pek a nih theih nan leh kalphung thar hnuaia hna thawh tur tihtawp loha kalpui a nih theih nan Rs. vaibelchhe 95,692.31 siam phawt a nih thu a sawi bawk.
Union Rural Development Minister Shivraj Singh Chouhan-a chuan sorkar laipui chuan ‘thingtlanga hnathawk theite tumah ni khat pawh hna nei lova an awm loh’ chu a tum a ni tih a sawi a. Dan hi kalpui a nih theih nan sorkar laipui leh state sorkarte thawhhona, inrelbawlna, sum leh technical-a inbuatsaihna tihfel a nih thu a sawi bawk.
VB-G RAM G hman tan hma ni, Thawhlehni khan sorkar laipui chuan hlawh zat bi siam thatna a tichhuak a. Ni 100 inhlawhna tia hriat, MGNREGA hnuaia ni khata Rs 298.8 hlawh thin chu VB-G RAM G hnuaiah chuan Rs 327.4 a ni tawh dawn a, ni khatah Rs. 28.6-in a pung a ni.
Scheme kalpui kawngah hian tual chhung rorel khawl (gram panchayat)-te chuan hmun pawimawh tak an chang chhunzawm dawn a, hna thawh tur siam, tui humhalh, lo neih leh a kaihhnawih hnathawh, thingtlanga hmunhma tha din leh hmeichhiate tihchakna an ngaih pawimawh ber dawn niin rural development ministry chuan a tar lang.
State leh UT 29 tan budget ruahmanna siam a ni tawh a, State 24-in anmahni VB-G RAM G scheme hriattir an tichhuak tawh bawk.
VB-G RAM G Act hi ram pum huapin Ningani hian Andhra Pradesh-a Tirupati district-ah tlangzarhna a ni dawn tih ministry chuan a tar lang. He hunah hian Gramin Rozgar Guarantee Card sem a ni ang a, mission kaihhnawih awareness material-te pawh tlangzarh a ni ang.
VB-G RAM G), 2025 hmang tan
