SASCI sum hman hman loha centre-a cheng vaibelchhe 233 kir leh a ngai chu ZPM sawrkar mawh a ni tih BJP Mizoram president Vanlalhmuaka chuan a sawi.
Thawhtannia BJP State office-a political session-ah Vanlalhmuaka chuan, Mizoram kan rethei hle a, thawhchhuah mumal tak pawh kan neih loh laiin, central-in sum min pek kan ti lapse reng mai chu mak a tih thu sawiin, sawrkarin engmah tak tak a ngaihtuah loh zia tichiangtu a ni tih a sawi.
“Kumina sum lapse cheng vaibelchhe 233 hi MNF sawrkar mawhpuh chi a ni loa, sawrkar lai ZPM mawhphurhna liau liau a ni. ZPM hian huaisen taka an tihsual hi inpawm mai turin ka chah duh a ni,” a ti.
Mizoram tana sum dah sa leh hmasawnna hnathawhna tur sum hman loha luangral thin chu a pawi takzet tih sawiin, sum hman loha luangral thin chu sawrkar hmasaah pawh a thleng foa, hetiang thil a thlen chhan chu sawrkar inthlahdah vang leh huamhauh vang a ni thin tih BJP State president hian a sawi. “Mahni fel lohna pawm duh loa, midang mawhpuh kan ching thin hi a Kristian lo hle,” a ti.
Inkhawm zawh hian Lok Sabha MP inthlan thlirletin thutkhawm a ni a. Kaihruaitu Election Management coordinator Dr K Beichhua MLA chuan MP inthlan neih chhunga party thenkhatin dawt hmanga BJP an beihnaah thudik sawifiahna hun an neih avangin, Mizoram mipuiin BJP nihna diktak an hmu thei ta tih a sawi. “Party thenkhatin thudik lo hmanga vawiin thlenga min bei hi, thudik zawk hailan a nih zel avangin BJP chuan a lawmawm kan ti hle a. Ram leh hnam tan leh Mizoram hmasawnna turin hma kan la zel dawn,” a ti.
Vbch. 233 lapse hi ZPM sawrkar mawh ani – BJP Mizoram president
