Village council kaltlanga inrelbawlna tur ‘The Mizoram (Village Councils) Bill 2024’ buatsaih mek chu a tum hnihna atan enhoin Local Administration minister C Lalsawivunga kaihhruaiin Zirtawpni khan thutkhawm a ni.
LAD secretary Teresy Vanlalhruaii chuan Bill chungchang a sawizau a. LAD-a thawktute, Drafting Committee member, political party leh tlawmngai pawl aiawhte an tel.
Minister chuan thingtlang lam khuate tihhmasawnna tur, mahni inrelbawl thei tura thuneihna pek leh khawtlang tana hmathatna hrang hrang awmte chak zawka kalpui a nih theih nan ‘The Mizoram (Village Councils) Bill 2024’ hi ruahman a ni tih a sawi a. Khawtlang tihhmawsawn nana inkaihhruaina tur a nih dawn avangin uluk taka zirchian leh sawiho a pawimawh, tiin, Consultative Committee thutkhawm hmasa thurel bawhzuia chak tak a hma latu Drafting Committee inpekna lawmawm a tih thu a sawi.
He Bill-ah hian VC din theih dan, VC member bituk zat, VC hruaitu thlan dan leh inthlanna chuh tura thil ngai hrang hrang a awm a. VC thuneihna leh hmasawnna hna thawh kawnga inkaihhruaina leh mawhphurhna a chuang bawk.
VC dan thar duan mek enho
