VC inthlan zawh hnuah chauh sawrkarin sawhthing lei a tum – Lal Thanzara

VC inthlan zawh hnuah chauh
sawrkarin sawhthing lei a tum
– Lal Thanzara
ZPM sawrkar chuan sawhthing an lei theih dawn leh dawn loh hriat a nih hmaa village council inthlan zawhfel an duh a, inthlan zawhah chauh sawhthing lei an tum niin Congress president Lal Thanzara chuan a sawi.
Mizoram Pradesh Congress Committee chuan kum 2025 atan Thawhtanni khan Congress Bhavan an hawng a. Thu sawitu MPCC president chuan April 2024 khan Assam Rifles chhuah hun tur a lar a, tunlai hian Ferbruary 20 a lar leh ta nia sawiin, “Kan sawrkar hian VC term pawt tawiin Febuary 19-ah an titawp a. Chumi hma chuan VC inthlan ngei a ngai a ni. Sawhthing an lei theih dawn leh dawn loh hriat a nih hmaa inthlan zawhfel an duh a, VC inthlan zawhah chauh sawrkarin sawhthing lei an tum,” a ti.
Tunhnaiah BJP Mizoram hotuten ZPM sawrkar chu Central BJP hotuten an thlir reng thu leh lei venthat a tul thu an sawi bakah sum harsatna sutkianna tha ber tur chu BJP zawm mai a ni tih an lo sawi tawh a. An thusawi hian awmzia a nei thuk viau a rinawm, tiin, Central BJP hruaitute nena innel tak pakhat chuan Mizoram sawrkarin central-a project an zu thehluh hi central khuan tihhlawhtlin an chak viau loin a sawi a, dawt a nih a rinawm loh tih a sawi.
MNF-in nasa taka a sawpchhiat tawh Tuirial Hydel Project chu Pu Lal Thanhawla hoa an tharthawh leha an tih puitlin tak pawh hmanni lawkah Power minister chuan ‘sumthuninu’ a ni, tiin, a, anchhe dawng angah an chhuah tih Lal Thanzara hian a sawi a. Chanchinbuah a bulthut atanga engkim hria in thil awmzia a rawn ziak han chhiar chuan, BJP State president-in lei ven that a tul thu a sawi chu a hriatchhuah loh theih loh tih a sawi a ni.
Boruak thianghlim neih theihnan sawrkarin halpuah leh halmawi a khap chu kohhran leh Central YMA thlawpna avangin kum dang aia kan uar lo chu lawmawm a tih thu a sawi a. Ram leh mipui thatna tura sawrkar hmalakna chu Congress party chuan a thlawp zel dawn tih a sawi.
“Kan khawtlang nun leh dinhmun kan hria a, ruihhloin min run mek a ni. Natna hrang hrang leh cancer kan vei nasa em emte, neih inang inkawp an lo pung ta te hi Kristian ram intite tan a inhmeh lo a. Heng hi kan vei a hun tawh a, thalai hetiang veimite siamtha a, politic-a rawn lut turin kan sawm a ni. Engemaw vanga kan party chhuahsan ta te pawh rawn let leh turin ka sawm che u a ni,” MPCC president hian a ti.
MPCC Special Assembly-a a puan tawh angin, Congress an sawrkar leh a nih chuan Mizoram mipui tan NLUP an tharthawh leh dawn tih a sawi bawk.
AICC member, MPCC president hlui Dr Lal Thanhawla pawhin thu sawiin, an tih theih loh tur ti turin an party hotute an insawi ngai loa, Lengpui Airport an siam laia ‘Choak bak tum lo turin tih sak thin mah se, kan hman tangkai ta hle a. Chutihlaiin, tih ral chak tlat kan awm chu a pawi hle, tiin a sawi.
Look East Policy chu hmathlir thui tak neiin an ruahman a. Khawchhak lam – Vietnam, Cambodia leh Myanmar thlengin insumdawn tawnin, kan inunauna pawh a lo tha chho ang, tia an ruahman chu khatihlaia Prime minister Manmohan Singh chuan tha a ti hle a. Champhai thlengin kawng sial a ni a, tunah chuan kawng tha tak kan lo nei ta tih a sawi. “Amaherawh chu sawrkarah kan awm ta loa, kan ruahman angin kan tihlawhtling hman ta lo,” a ti.