VC term pawh tawi chungchanga Mizoram sorkar khinna chu zawh fel a ni a, Zirtawpni khan court thutlukna puan a ni a, sorkarin thiam a chang. VC term pawh tawi chungchangah East Lungdar VC president, All Mizoram Village Councils Association president K Lalngaizuala’n Gauhati High Court, Aizawl Bench-ah a khing a ni.
Court rorelnaa lan danin, Mizoram sorkarin VC term pawh tawi chhana a chhuanlam, sum harsatna tih chu sorkar file enin a dik a, sorkar file nen a inmil tih a ni.
A khingtu lam hian chhan leh vang awm lovin VC term hi pawh tawi a ni tiin an khing a, sorkar lam chuan sum harsat vanga pawh tawi a ni tiin an chhang.
Sorkar lamin court-a an thlen dan chuan, Post Devolution Revenue Defecit Grant atanga sum hmuh hi kum tin a tlahniam tih a ni a, a khingtu lam chuan Post Devolution Revenue Defecit Grant atanga sum hmuh tlahniam telh telh mah se hmun dang atanga sum hmuh a pung thung a, sum hmuh zawng zawng hi a pung tho an ti.
Court hian sorkar record en a duh a, January ni 24 khan sorkar aiawha dingte’n heng hi court-ah an thehlut. Court hian a duhtawk lo a, February ni 3-ah thehluhtir lehin court hian a en ta a ni.
Chumi hnuah court chuan thutlukna a puang a, sorkarin VC term pawh tawi chhana a sawi hi sorkar record nen a inmil thlap e tiin, sorkar lam tanna a dik tiin thu a titlu ta a ni.
A tirah All Mizoram Village Councils Association hmingin court-ah hian an khing a, mahse he pawl hi registered a lo nih loh avanga court-in a hnawl hnuah K Lalngaizuala’n ama hmingin a khing ta a ni. 2024 December ni 12-ah High Court-ah hian ngaihtuah tan a ni a, mahse VC term pawh tawina notification dang, November ni 21, 2024-ah a lo awm tih hriatchhuah niin, an khin kha November ni 20, 2024-a mi a nih avangin, a khingtute chuan siamthat an dil a, chu chu pawm niin, November ni 21, 2024-a sorkarin VC term a pawh tawina chungchang chu court-in a ngaihtuah ta a ni.
VC term pawh tawi chung- changah sorkar chak
