Vegas hnehna leh McLaren hremna vangin
Verstappen-a title beiseina nung thar!
Red Bull driver Max Verstappen chuan Inrinni khan Formula One Las Vegas Grand Prix hnehna changin, driver standing lama a tluk loh pahnih McLaren driver ve ve Lando Norris leh a team-mate Oscar Piastri-te chu intlansiak zawhah khawl lam thila dan bawhchhiatna (technical infringement) avangin ‘disqualify’ an ni a, hei hian Verstappen-a tan title beiseina a tinung zui ta a ni!
Las Vegas Strip Circuit, Las Vegas, Nevada intlansiakah khan Dutch driver ropui Verstappen hi thleng hmasaber ringawt mah se hmahruaitu Briton Norris kha pahnihnaah thlengin, race vawi hnih leh sprint race pakhat chauh awm tawhah title race-a amah hnaih bertu Piastri chu point 30 laiin a kalsan a, driver standing-a a hnuaia beiseina nei ve dang pahnihte lakah Norris-a chan a tha hman hle a, mahse, McLaren driver pahnih hi ‘disqualify’ an nih leh tak si avangin Red Bull driver Verstappen tan beiseina thar a piang zui ta a ni.
Las Vegas race zawh hnu khan Norris leh a team-mate Piastri-te McLaren car hnuaia part chi khat ‘skid block’ an tih chu dan phal chi nen inmil loa vuah a ni tih hmuhchhuah niin, hei vang hian Nevada race-ah khan tlan ve lo anga ziahluh that leh niin, pahnihna leh palina ken tel an point hmuhsa pawh chhuhsak leh an ni a, Verstappen-a tan championship standing-a a ute pahnih chetchhiatna hi title race-a a beiseina chuai tawh lam chhem vam lehtu a ni zui ta!
Point paih hnuah hmahruaitu Norris hian Las Vegas Grand Prix atanga point hmuh belh loin a neihsa point 390 a hum chhunzawm a; title race-a a elpui awmchhun ni tawh pahnih Dutchman Verstappen leh Australian Piastri-te’n point 366 ve ve neiin, point 24-in Briton pha lo ve ve mah se a tam bera point 58 la hmuh theihna intlansiak vawi hnih leh sprint race pakhat la awmah champion theihna ‘chance’ inang an nei a tih theih ang.
Las Vegas atang hian Formula 1 chu kartawp November ni 28-30 chhung hian Middle East lamah an insawn dawn a, Qatar Grand Prix-ah hian extra point hmuh theihna sprint event a awm tel bawk dawn a; chu mi zawh chuan season kharna race hmachhawn turin Abu Dhabi lamah December ni 5-7 khian an fuankhawm leh ang.
Qatar-a a chak hrim hrim chuan kum 26 mi Norris kutah drivers’ title a lut tawh dawn a, mahse, a chak ngei dawn tih ziak a awm miau lo a, beiseina la nei ve pahnih Verstappen leh Piastri tan title race a la tawp lo!
Season tawp lama hlauhawm chho leh ta tlat Verstappen hian tun season-ah vawi ruk hnehna chang tling tain, Formula One world championship hnuhnung paliah drivers’ title a la fai vek a; kumin pawh hian a tawnhriat hmangin vawi sa rih e ve chak tawh MacLaren driver pahnih a nawr na chho leh ta mek a, a vawi khatna atana F1 champion nih tum ve ve Norris leh Piastri lakah hian a title kawl lai a humhim zo dawn em kan thlir tak tak ang!
McLaren driver pahnih kha ‘disqualify’ loin an result pangngai kha dingtlang chu ni se pahnihnaa thleng Norris khan Las Vegas-a palina luahtu Piastri lakah point 30-in hma a hruaifal ang a, Las Vegas-a pakhatna leh driver standing lama pathumna ni mek Verstappen nena an inthlauhna pawh 42-a dah thei tur a ni a, hremna an tuar ta khan Norris-a title hmasaber tur beiseina zinkawng a pawtseiin, a tisukuk thei a, Qatar-a a chak chuan sawi buai tur awm loin hnehna nen season a khar thei tho bawk.
British driver Norris-a disqualification avang khan Mercedes driver driver pahnih George Russell leh Kimi Antonelli-te chuan lawman semna dawhsan luah ve vein, pahnihna leh pathumnaah n tawlh chho.
Vegas hnehna leh McLaren hremna vangin Verstappen-a title beiseina nung thar!
