Mahindra & Mahindra Financial Services Limited atanga document lem hmanga vehicle loan pekchhuahnaa inhnamhnawih mi 11 chu police-ten an man a, sumfai leh thildang cheng vaibelchhe 150 hu vel a inrawlh a ni.DG of Police Mizoram Anil Shukla sawi danin, he thil hi kum 4 kalta vela intan, kum 2022 atanga kalpui uar chho a ni. Vehicle loan leh loan dang pe thin, non-banking financial company – Mahindra & Mahindra Financial Services Limited (MMFSL) Aizawl Branch-a area business manager Jakir Hussain (41) chuan an company atanga vehicle loan pechhuak turin document (lem) hmangin loan a dil (sak) thin a, intihrinawmna atan car lak tak tak pawh an nei a, Aizawl hmun hrang hrang atangin police-ten car hi an lakhawm tawh.
Hemi atan hian MMFSL-a a thawhpui Mizo pahnih – Edenthara (business executive) leh H Lalthankima (office staff) te nen ‘Mahindra Finance Limited’ tih hming phuahchawpin bank-ah account an hawng a, bank account hawnna atana tul – stamp lem, seal lem leh document dang siamchawp vek hmangin, Mizo pahnih hi an company senior official angin hmahtheha hman an ni.
Lirthei pechuak tak tak si loa, loan pek thin a nih avang hian Aizawla car & three wheeler dealer 5 chu he thilah hian inhnamhnawih ve nia hriat an ni a, Jakir Hussain leh a thurualpuite bank account an ‘freeze’ sak rualin, heng dealer-te bank account pawh police-te hian an ‘freeze’ sak ve tih DGP hian a sawi.
MMFSL atanga vehicle loan lakna atana document leh hming lem an siamnaah Jakir Hussain hian mi pakhat, Manoj Sunar chu thla khata Rs. 15000 hlawhin a ruai thin a, heng ‘file lem’ hi an company sum an audit lai chuan Manoj-a inah ipa khungin an dahtha mai thin a, file lem 549 leh stamp lem 25 chu police-te hian Manoj-a in atanga an man.
An thil lem tihnaah hian company lamin an rinhlelh lohna turin bank account lem an siam atang hian a khat tawkin EMI payment an ti thin a, hei bakah hian company-in an rinhlelh lohna tura tih tul dang an ti thin bawk.
An hnen atanga vehicle loan lak chungchangah hian rinhlelh neiin MMFSL hotute chuan Aizawl Police Station-ah kumin March 20 khan FIR an rawn thehlut a, March 29 khan Crime & Economic Offence P/S ah FIR dang thehlut lehin, DGP hian special investivation team (SIT) a din a. An ni hian rang takin an chhuichhuak a ni.
He thila a bul tumtu ber Jakir Hussain hi Tejpur Assam, tuna Tuikhuahtlanga a nupui fanute nena khawsa a ni a; accountant niin, MMFSL Aizawl branch-a area manager nilai a ni. A thurualpui dang hriatchhuah tawh 10 zinga 7 hi hnamdang an ni a, Mizo 4 an tel. Hnamdang pahnih zing ami Praloy Das hi MMFSL thawk tho, Jakir Hussain ‘pu’ a ni a, a ‘pu hlui’ Yogesh Sarda pawh telin, Jakir-a’n document lem hmanga loan a lak thin hi an hriatpui a, an ka hup nan sum a pe ve thin tih hriat a ni. Mahindra Finance-a thawk dang Lalrinnunga Ralte leh Lachhandama bakah Tata dealer-te chhawr Kajal Das te chu man zingah an tel.
Hmun hrang hranga car loan mela an siam thinah, loan lak tum chuang lote pawh, an car duh ang a awm huna tihsak a awlsam nan tia chhalin an Aadhaar card leh document dangte an dil thin a, a neitute hriat loh hian loan lak nana document lem siamnaah an hmang tangkai zui thin nia sawi a ni.
He inbumnaa police-in an man leh hmuhlet tawh:
8 Document lem hmanga loan laknaa hming lem hman hi 2000 chuang a ni
8 Bank account (lem) 26, cheng vaibelchhe 2.5 vel awmna
8 Car dealer ho bank account cheng vbch. 1 vel awmna
8 Car dealer-te hian MMFSL hnenah loan lak tawh rulhna atan cheng vbch. 3.47 an pe let tawh
8 Car thar tak tak 15, a vaiin cheng vbch.3 hu hmuhlet a ni tawh
8 Laptop 3, mobile phone 10, customer file (lem) 549, seal lem 25 (VC seal thlengin a tel), SIM card 30 chuang, mimal diary 2 leh document dang engemawzat
8 Bultumtu ber Jakir Hussein ta nia chhal, in leh lo leh thildang, cheng vbch.3 hu hriatchhuah a ni tawh