Tun hnaiah Chhinga veng leh Dawrpui veng inkarah inhriatthiamlohna boruak a thleng zeuh a, Chhinga Veng |halai Pawl lamin pawi an tih thu thuchhuah siamin thil thlen dan an puangzar a, hetiangin:
Tun hmain ramri buai an neih an hre ngai lo a, Electric Veng Sakawrpului atanga Bazar pan chhohna atanga ABC lane hi pi leh pu atanga Chhinga Veng chhung a ni. Kum 2020-2021 Covid len lai khan helai area-ah hian Dawrpui lamin dawr inkhar tura hriattirna lehkha an sem a, Chhinga Vengin an veng chhung a nih avangin dawr inhawng turin an hrilh ve thung a. Kum 2025 kum tawp lamah Chhinga Veng Local Council leh NGOs te chuan Chhinga Veng chhunga dan phal loha sumdawngte titawp turin hma an la a, vai sumdawng tam tak pawh tihtawptir an ni a, March 2026 khan Dawrpui Local Council chuan ABC lane a awmte chu Dawrpui Veng hming lanna Sign board tar turin an hriattir. Y.M.A day tuk, ni 15.6.2026 khan Dawrpui hnatlang chuan Chhinga Veng chhungah hna an thawk a, tawngkamin Chhinga Veng KTP leh Y.M.A building te chu ‘Dawrpui Venga awm in ni e’ tiin an sawi. He thil hi hrethiam lovin Chhinga veng thalaite an che chhuak ta a ni.
He thu buatsaih lai hian Dawrpui veng lam thuchhuah hriat hman a ni ta chiah lova. Eng pawh ni se, Dawrpui lam hian thuchhuah siam pawh ni se, ‘kan lo thiam lo zawk a ni e’ an ti bik kher lo maithei e. Chu lam chu lo duhtawk ta ila.
Kum 2019 kum tawp lam khan Chanmari veng leh Zarkawt veng pawh ramri chungchangah an lo buai zauh tawh a nih kha. Chanmari lamin an veng ramri chin nia an hriatah signboard tar an tum a, Zarkawt lamin an lo remti chiah lo a ni awm e; buaina chhuak thei a nih avangin buaina chhuak tur veng turin police lam pawh veng pahnih inkarah an ding a, an innawr buai deuh laih hman nghe nghe a nih kha.
Veng feeling han tih hian, Mizo tawng leh sap tawng inpawlh hian thil awmzia a pholang chiang zawk mah awm e. Chutih rualin, “Feeling” tih hian a huap zau thei hle ang a. Veng chhung inlungrualna leh inpuih tawnna lam (sense of community) te, mahni veng dih bikna leh chhuan riauna (neighborhood pride) te, a chang chuan, hlimna lam a ni emaw, tuarna lam a ni emaw, dam leh tlang khatah, thih leh ruam khatah tih ang chi (camaraderie) te pawh ‘Veng Feeling’ tih hian a huap vek a ni.
A pawimawh ta ber chu, mipuiin ram leh hnam inrelbawlna hna thawk tura mipui aiawha kan thlan (MLA, AMC, LC, VC etc) te hi mipuiin thuneihna kan pek te an ni a, eng emaw veng leh veng inkar thil a lo awm a nih pawhin, thuneitute nen sawi ho, rel ho hi dah pawimawh hmasakah nei zel thei ila, chu chu buaina pumpelhna tur tha tak a nih a rinawm.
Veng dangah pawh ramri chungchang a ni emaw, thil dangah pawh, inhriatthiamlohna thleng thin a awm maithei a. Chhinga Veng leh Dawrpui Veng inkara thil thleng ang hi veng dangah pawh la thleng thei vek a ni. Thuneitu lam hian hetiang buaina thleng thei tur ang hi a awm leh awm loh dap chhuah run pui te hi kalpui nghe nghe se a tha phian awm asin.
Veng Feeling leh a behbawm…
