Veng feeling neih dan thiam ang
– Lalduhoma
Aizawl Municipal Corporation inthlan turah ‘veng feeling’ an nei a nih pawhin veng tana hmasawn zawnga rilru pu turin mipui a ngen tih ZPM hruaitu Lalduhoma chuan a sawi.
Ningani zana Dinthar-a an party hun hmanah ZPM leader, chief minister Lalduhoma chuan, ‘veng feeling’ neih hrim hrim chu a sual loa, chutihlaiin kan veng hmasawnna thlen theitu ni lo ai chuan veng tana hmasawnna thlen theitu zawk candidate vote mai chu veng feeling neih dan dik a ni, tiin a sawi. State sawrkar do ngar ngartute candidate vote aiin state sawrkar thawhpui theih ZPM candidate vote chu veng tinin an sawtpui a ring tih a sawi bawk.
An party zawm tharte a lawmluhnaah, “Kan chuanna motor-in kan kal duhna min thlen dawn lo a nih chuan kan zuang thla anga, a dik zawka pakai hi hreh tur a ni lo,” a ti.
Tunhnaia Synod Prison Ministry-in jail tang a zirchianna behchhana thu sawiin chief minister chuan, Aizawl mi, tan ina tang an tam chu pawi a tih thu a sawi. “Aizawl khawpui leh hmun dangah chhungkua a keh chhe nasa a, chumi nghawng chu kan tuar nasa a ni. Aizawl enkawl hna hi eirukna tel loa tih tak taka enkawl a tul,” a ti.
Kum hnih chhungin ZPM sawrkar hnuaiah thil thar tha tam tak a awm tih a sawi a, chutih laiin eptu lamin mimal nun thleng thlenga inumzuia politics an khel chu tha lo a tih thu a sawi a ni.
Bialtu MLA Lalnghinglova Hmar chuan Aizawl West II bial chhunga hun reilote chhunga hmasawnna ruhrel dinna tura sum dah chu a beisei phak bak a ni tih a sawi a. Sawrkar leh chief minister-in an duhsak takzet tih a sawi. “Kum hnih leh a chanve tlin hmaa bial chhunga cheng nuai 12736 dah a ni hi a lawmawm rualin, a inthlahrunawm lek lek zawk,” a ti.
Lok Sabha MP Richard Lalhmangaiha pawhin, AMC inthlan tura mayor nilai a chawl ta daih chu mak a tih thu a sawi a. “A bial hi hmeichhe bial a ni si loa, mayor ber a ding nawn ngam ta lo hian boruak awm dan a hril chiang hle,” a ti.
Veng feeling neih dan thiam ang – Lalduhoma
