Vengchhung kawng siam dan tur en
Aizawl North III bialtu MLA, minister K Sapdanga chuan Thawhlehni khan a bial Edenthar vengchhung inkalpawhna kawngpui siam dan tur a en a. AMC Ward. No.VI corporator H. Lalremtluanga, PWD hotute leh Local Council lamin an tawiawm.
Edenthar vengchhung kawngpui chhe lutuk chu a rang thei ang bera siam turin ruahmanna siam mek a ni a, PWD pawh a theih ang angin a lo bawhzui zel dawn a, veng mipuiin an nghahhlelh thu pawh a hria a, siam hma ngeia PWD hotute nen en tul a ti a, siam thuai a nih theihnan chak takin an bawhzui zel dawn tih a sawi a ni.
Edenthar Govt. Primary School pawh bialtu MLA hian tlawh nghalin, a bial chhungah Education department-in model school thlang turin an ti a, Mizoram-a Govt. Primary School zinga zirlai ngah ber Edenthar Primary School a thlang a, he school hmasawnna tur hian theihtawp chhuah zel a tum tih a sawi. Zirtirtu indaih loh thu hrilh a ni a, a hmunah a takin a rawn hmu bawk a. Kum khat chhung atan zirtitirtu pahnih rawihna tur a MLA Fund atangin an ti anga, zirna pawhin hma a sawn phah ngei a beisei tih a sawi a ni.
Aizawl North III bialtu MLA hian tunah Govt. Electric Primary School-II ah zirtirtu pakhat a fund atangin a ruai mek a, Edenthar Primary School-ah pahnih a rawih leh chuan a bial chhungah zirtirtu pathum a ruai dawn ta tih sawi a ni.
Vengchhung kawng siam dan tur en
