September ni 12-a result hriatah Mizoramah Covid-19 natna vei hriatchhuah thar mi 26 an awm a, chung zinga 18 chu Venghnuai mi an ni. A hmaa mite nen Venghnuaiah positive hriatchhuah tawh mi 28 an awm ta.
Venghnuai hi a veng mal leh khaw mala lakin Mizoramah Covid-19 natna vei hriatchhuah an tam berna a ni.
Venghnuai hi hri kai an awm vanga an inchhuina (contact tracing) atangin an inhmuh belh a, September ni 9 khan mi panga an positive tih hriat a lo ni tawh. Mi pangate hmaah hian positive an awm tawh bawk. Chutianga an inchhui avang chuan Aizawl khawpui inkharkhip hma September ni 9 khan an veng LLTF chuan pawn chhuak lo turin veng mipuite an lo ngen tawh.
September ni 12-a positive hriat thar mi 18-te zinga 14-te chu an veng task force hruaitute an ni.
Tuikhuahtlang-ah pawh positive 13 an awm ta a, he hri laka an him reng hnuah Republic Veng-ah pawh Chawlhni-a result hriatah positive pathum an awm.
Republic Veng-ah hian chhungkaw 40 chuang an inkhung mek a, home quarantine tite hi mi 200 chuang an ni tih thu dawn a ni.
(THE AIZAWL POST – Tualchhung)
Full>> ePaper Subscribe
