Mizoram Health & Family Welfare Board vice chairman Dr ZR Thiamsanga, MLA chuan Pathianni khan Covid kai hmuhchhuah tamna – Venghnuaia ruahmanna an siam danin enin a tlawh
Tunhnaia an veng chhung mi Covid-19 kai hmuh tamna Venghnuai leh Tuikhuahtlang chuan an veng chhunga kohhran hmunhma chu hri kaite enkawlna – Covid Care Centre atan hman an remti.
Pathianni khan minister pahnih – Lalruatkima leh Lalchhandama Ralte bakah MLA pahnih – Lalrinsanga Ralte leh Lalmuanpuia ten Venghnuai leh Tuikhuahtlang hi an tlawh a, khawtlang mipui harsatna tawh dan ngaithla in hma lak theih dan tur te an sawi a. Heng veng pahniha kohhran hmunhma chu a veng mite hian Covid Care Centre (CCC) atana hman an remtih thu hi an lo sawi a ni. An ni bakah hian Electric Veng pawhin an vengah CCC neih an remtih thu an sawi tawh bawk nia thu dawn a ni a. Vawiin lam hian sawrkarin CCC atan a puang turin a bawhzui dawn tih thu dawn a ni.
Venghnuai khawtlang hruaitute leh Presbyterian Kohhran puipate inrawnkhawm chuan Venghnuai Presbyterian biak in chu CCC atan hman an remti a. Pathianni khan Mizoram Health & Family Welfare Board vice chairman Dr ZR Thiamsanga, MLA pawhin Venghnuai hi tlawhin an veng mi Covid-19 kaite enkawlna kawnga khawtlang mipui hmalakna a hmuhpui a, khawtlang hruaitute nen inkawmin, Covid-19 kai an pun chhoh tak zel avang leh a bikin Aizawl leh a chhehvelah CCC indaihlohna a nasat zel avangin biak in hi hri kaite enkawl nana hman an remtih thu an lo hrilh.
Venghnuai khawtlang hruaitute hnenah Dr ZR Thiamsanga hian lawmthu hrilhin, “Sawrkar rilru hria a, hmahruaitu ni tura Venghnuai khawtlang inpeknaah sawrkar aiawhin lawmthu ka sawi a, kohhran hruaitute pawh Pathian malsawmna dawng tlaka in rawn penchhuak hi ropui ka ti a ni,” a ti. Venghnuai Presbyterian Kohhran biak in chu mi 50 len theihna CCC atan notify a nih tur thu a sawi.
(THE AIZAWL POST – Tualchhung)
Full>> ePaper Subscribe
