Ukraine leh Germany chuan ram venhimna kawngah thawhho an rem ti a, drone siam chhuahnaah thawhhona an nei dawn a, Kyiv-a air defence tihchakna pawh a huam tel dawn.
Ukrainian President Volodymyr Zelenskyy-a chuan Thawhlehni khan Berlin-ah German Chancellor Friedrich Merz-a nen thuthar lakhawmtute an kawmnaah inremna hi a puang a. Germany chuan Ukraine-in Russia nen an indo kaihhnawiha drone lama thiamna sang a neihte chu a hmang thei dawn a, German sipai puihna dang a dawn belh ve thung dawn a ni.
Zelenskyy-a chuan thawhhona hian ‘drone, missile, software leh tunlai defense system chi hrang hrang’ a huam tih a sawi.
Thuchhuah intawm an siamah ram pahnihte chuan ‘air defence-a thawhhona an tihchak’ tur thu an sawi a. Germany chuan ‘Ukraine-a drone industry a thlawp chhunzawm zel bakah drone siam chhuah dunna tur din chhunzawm a ni dawn’ tih a sawi bawk.
German defence ministry chuan US atanga Patriot missile tam tak leina tur sum pek an remtih thu a sawi a. Zan tin Russia atanga drone leh missile hmanga beih an nih avangin Ukraine hian air defense system a mamawh hle a ni.
Ukrainian Defence Minister Mykhailo Fedorov-a chuan social media hmangin German Defence Minister Boris Pistorius hnenah lawmthu a hrilh a, sum an pek tur hi Euro tluklehdingawn li ($tld 4.7) a nih thu a sawi a, hei hi ‘kan air defence tana hmasawnna nasa tak a ni a… kan khawpui leh thil pawimawh tak takte hum nan a tangkai dawn’ tih a sawi.
Zelenskyy-a chuan an ramin sipai hmanrua an hman mek let hnih zeta tam an siam chhuak thei a; mahse, a siam chhuah tihpunna tur sum an tlachham niin a sawi.
Merz-a chuan inremna hi Ukraine chauhvin a hlawkpui dawn lo tih a sawi a. “Kan tan pawh a hlawk a, Europe-ah tun hnai kum 20 chhung hian Ukrainian sipaite anga indonaa fiahna hmachhawn an la awm loh avangin kan himna atan pawh a hlawk hle dawn a ni,” a ti.
German hruaitu chuan inremnaah hian ralthuam system thar siamna atana digital combat data inthlengna pawh a tel tih a sawi bawk.
Ukraine-in Russia beihna laka invenna atana ralthuam dang a mamawh tih hi Thawhlehni pawh khan lang lehin Moscow-in a beih chhunzawm zel.
Ukrainian khawchhak lam khawpui, Dnipro chu missile-a beih niin mi pali an thi a, mi 21 an hliam niin region thuneituten an sawi.
Dnipropetrovsk bial hotu, Oleksandr Ganzha-a chuan dawr kawngkhar chhe tawh thlalak a tar lang a, hliam zinga 10 chu ‘thil puak darh theimin a hliam, ruh tliak’ nia sawiin ‘an dinhmun a tha lo hle’ tih a sawi bawk.
Russian sipaite hian Ukraine an beih hnua an ram bial pali a laksak zingah Dnipropetrovsk region hi la tel lo mah se zau tak an laksak tawh.
Chhim lam khawpui, Kherson-ah pawh beihna thlengah hmeichhia kum 52 mi a thi a. Drone hmanga beihnaah hian mi dang pakhatin hliam na tak a tuar bawk niin thuneituten an sawi.
February 2022 atanga Russia-in Ukraine-a beihpui thlak a tan atangin civil mi sang tam tak an thi tawh a. Indona tihtawp tumin US chuan hma a lakna chu chawlhsan a ni mek a, Washington hian Iran laka Israel nena an indona an kalpui lam a ngaihtuah zawk rih a ni.
Venhimna kawngah Ukraine leh Germany inrem
