GIG Motors Veteran Football Tournament 2024 ni riatna chu nimin, May ni 7, Thawhlehni khan 1st MAP Ground, Armed Vengah semi-final khelh zawh niin, Ward IX leh Lengpui Veteran chuan an khingpui hneh ve vein final an lut a, May ni 9, Ningani chawhnu dar 1:00-ah team pahnih hian champion nih an inchuh ang.
Ward II 2-3 Ward IX
Nimin semi-final inkhel hmasa zawkah Ward IX chuan 3-2-in Ward II an hneh.
First half-ah goal thum a lut a, second half-ah goal khat a luh belh bawk.
Inkhel tan a ni a, Ward II tan minute 6-na lekah Rinkima chuan an goal hmahruai khung mah se minute riat a ral hmain Ward IX tan S. Malsawmtluanga (Mama) ball pek atangin Vanhlupuia chuan an siphurh a rul. Minute 5 a ral leh hmain Mama chuan goal khung belhin Ward IX chuan 2-1-in hma an hruai a, chawlhlawk an hmang.
Second half-ah goal hnih a luh belh bawk. Second half tan a ni a, minute 3-ah Ward II tan Ramdinthara chuan an siphurh sutin 2-2-in an inhnehtawk zui a, goal lut a awm tawh dawn lo emaw tih hnu hun tawp dawn minute 5 a la awminMalsawmtluanga ball pek hmangin Chuailova chuan an chakna goal a khung a, Ward IX chuan 3-2 a hnehna changin final an lut ta a ni.
Aizawl South III 3-3 Lengpui Veteran
(Penalty petah 4-3-in Lengpui Veteran an chak)
Inkhel hnunghnung zawk Aizawl South III leh Lengpui Veteran-te hun pangngaiah 2-2-in an inhnehtawk a, hunpek belhah pawh 3-3-in an la inhnehtawk cheu a, penalty shootout hmanga chak zawk zawn a nih hnuah 4-3-in Lengpui Veteran an vannei ta zawk a ni.
First half-ah goal thum a lut a, second half-ah goal thum a luh belh thung. Inkhel tan a ni a, Lengpui chuan nawr nghalin minute 3-ah Vanlalpeka chuan an goal hmahruai a khung.
Lengpui Veteran tan Vanlalngheta’n an siphurh a sut hnuah huntawp dawn added time-ah Lengpui tan Rohmingthanga chuan freekick atangin an goal hnihna a tilut a, Lengpui chuan 2-1-a hma hruaiin chawlhlawk an hmang.
Second half-ah Aizawl South III lamin inkhel thunun zawkin, an siphurh sutna hun tha nei nual mah se an pet goal thei mai lo. Lengpuiin 2-1-in hnehna an chang mai dawn emaw tih hnu hun pekbelhah Aizawl South III tan Vanlalngheta chuan an siphurh a sut a, chak zawk awm loin hun a tawp zui ta a ni.
Hun pek belh an ni a, team pahnihte an innawr tawn zak zak hnu hun tawp dawn minute nga la awmah goal hnih a lut.
Lengpui tan David-a ball pek luh tha zet chu Rohmingthanga’n goal-ah chantirin, an goal thumna khung mah se Aizawl South III tan Vanlalngheta chuan an siphurh a sut zui nghal. Chak zawk awm loin 3-3-in an inhneh tawk.
Penalty shoot out hmanga chak zawk zawn a ni a, Lengpui chuan 4-3 hnehna changin final an lut ta a ni.
Veteran Football Final khel tur Ward IX vs Lengpui Veteran
