Vigilance department chuan department hrang hranga disciplinary authority-te tan Thawhlehni khan workshop a buatsaih.
Hmanpuitu chief minister Lalduhoma chuan, sawrkar hnathawk tha, hun vawng dik, inpe zo neih an duh a, sawrkarna an chan rualin chutiang hmalakna chu an kalpui nghal tih a sawi a. Chhawrtlak loh indapchhuak turin Service Review Committee din vek turin department tin an ti a, a tul phei chuan special pension pek mai nise an ti a. A scheme pawh an siam tih sawiin, “Chu’ng zawng zawng chu ram tana hna tha zawk thawh kan duh vang a ni,” a ti.
Disciplinary authority-te tana workshop hi Mizorama hetiang workshop neih hmasak ber nia a hriat thu a sawi a. He workshop hian hnathawk tha lo leh chhawrtlak lohte chunga dan anga hmalak kawngah tichak se, sawrkar hnathawk tha zawk nei turin pui se an duh a. Disciplinary authority-ten an mawhphurhna, an thawh chhan leh thawh dan tur hrechiang se an duh tih a sawi a ni.
Inquiry officer-te chu thudik chauh innghahchhana hmang thin tura chahin, “Thlei bik nei loin, tehna dik tak chauh hmang ila, inquiry officer ruat kawngah pawh fimkhur ang u,” a ti a. Sawrkar chuan inquiry officer leh presenting officer-te lawmman (honorarium) chu sawrkar laipui rate angin an tisang a. Hei hian an hnathawh an ngaihhlutzia a tilang tih a sawi bawk.
Vigilance department quarterly report hnuhnung ber, March 2026-a a lan danin, department thenkhatin vigilance case an neih nual laiin, Agriculture & Farmers’ Welfare, Animal Husbandry & Veterinary, Art & Culture, Environment Forests & CC, Law & Judicial, Tourism leh department dang thenkhatin ‘nil’ report an nei tih chief minister hian a sawi a. An chungah lawmthu a sawi rualin, case nei department ho pawh tang thar a, case nei lo tura inbuatsaih turin a ngen tih a sawi a ni.
Chief secretary mawhphurhna la mektu, chief vigilance officer Sudhir Kumar chuan workshop buatsaih chhan a sawi a. Hemi hnu hian disciplinary authority-te hian an mawhphurhna leh hnathawh dan tur an zirho a ni.
Vigilance case nei lo department nih tum turin CM-in department tin chah
