Daily Newspaper

Villa in Martinez la lut

8

Premier League club Aston Villa chuan an squad thuamchak hna an thawk chho zel a, nipui bazara an player lakluh pathumna atan Emiliano Martinez chu Arsenal atangin an la lut a, kum li daih contract an ziahpui.

Villa hian si nghak tha tak, season liam ta tawp lamah Arsenal tan inlan a, khel tha thei tak Martinez hi £17m zet sengin an la lut. Villa manager Dean Smith chuan an si nghak thar Martinez chu an player pawimawh, hun rei tak chhung an chhawr theih tur a nih thu a sawi a. Kum 28 mi ni tawh mahse si nghak atan chuan a kum a la tam lova, an vanglai ang chauha ngaih la nih vangin an hma lam hunah an chhawr tangkai hle a rinthu a sawi bawk.

Chhungkaw harsa tak atanga sei lian Martinez hian kum 2010 khan Arsenal youth team a zawm a, senior team lamah hmun a chang hleithei lo. Season liam ta kum tawp lam khan a nekchhuah zawh loh Berd Leno a inhliam a, Leno inhliam hi Martinez tan inphochhuahna hun tha a ni. Inelna hrang hrangah vawi 23 inlanin a chetha chho hle a, pui zet zeta save a neih chhoh mawlh mawlh vangin ngaihven a hlawh ta hle. Arsenal hi FA Cup-ah a champion pui a, season khuh hawnnaah Liverpool hnehin Community Shield a lakpui leh bawk. Hun khir tak tawng thin Martinez hian FA Cup-ah an champion a, hun ropui an tawn chiah khan Argentina a chhungte a be nghal vat a, lawm avangin a biangah mittui a luang a, a insum thei hlawl lo a nih nghe nghe kha.

Season liam taah chetha bawk mahse Leno hliam a dam a, Gunners manager Mikel Arteta-a’n Leno a la rin zawk bawk si vangin a khelh tam theihna tur pan a duh a, Villa a pan ta a ni. Villa tan a khel tha a, hmun pawimawh a chang chho thei a nih chuan Argentina tan pawh hmun pawimawh a chan chho theih ngei a beiseiawm a, chu chu Arsenal a chhuahsan lian tak ni pawhin a lang.

Aston Villa hian Martinez an lak luh hmain player pahnih an lo la lut tawh a. Brentford atangin Ollie Watkins chu an player manto ber ni turin an la lut a, Nottingham Forrest atangin right-back Matty Cash an la lut tawh bawk. Anni bakah hian club lian zawkte nena sawizawm hlawh reng an captain Jack Grealish an thlung nghet fel tawh bawk a, Villa hian hun tha leh boruak hlimawm lam an tawng chho mek.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy