Mizoram inthlan vote chhiar hun sawn tura ngen tura Delhi-a cham mek NGO Coordination Committee te’n CEC (chief election commissioner) an hmu thei dawn a, hmaichhanah vote chhiar hun sawn tura ngen an tum.Zirtawpni khan NGO Coordination Committee hruaitute hi ECI (Election Commission of India) office-ah an kal a, CEC hmuh dilna, Aizawl atanga an thehluh sa ngaihvena kal an ni a, mahse CEC hi Delhi bul khaw dangah lehlangin a lo zin a, a staff te hmuin, a staff-te hian an dilna an hmuh thu leh, CEC hmuh theih hun a la chian loh thute an lo sawi. A tuka kal leh tum chungin an thlennaah an kir a, mahse a zanah thu thar an hre ta a ni.
NGO Coordination Committee te hi Thawhlehni tlai dar 3-a CEC hmuh phalsak an ni a, chu chu an nghak mek.
Vote chhiar hun tura tih December ni 3 hi Chawlhni a ni a, Chawlhni leh Inrinni ni lo ni danga sawn turin tlawmngai pawlte hian ECI hi ngenin, lehkha an lo thehlut tawh. Chumi hnuah hmaichhan ngeia ECI hotu CEC hmuh tumin Delhi an pan a ni.
Hetih lai hian Mizoram Synod chuan vote chhiar hun sawn a nih theih nana tawngtai turin kohhranhote an ngen a, Inrinni zan emaw Chawlhni inkhawmah emaw a remchan dan anga tawngtai turin tualchhung kohhrante an ngen.
“Inthlan vote chhiar hun sawn tura NGO Coordination Committee hmalakna a hlawhtlin ngei theih nana tawngtai tura Mizoram Kohhran Hruaitute Committee ten min ngen angin Nov. 25, 2023 (Inrinni) zan inkhawmah emaw, Nov. 26, 2023 (Pathianni) inkhawmah te mahni remchân anga tawngtai turin Kohhran hote kan inngên e,” tiin Synod hian an ngen a ni.
Vote chhiar hun sawn chungchangah CEC hmu thei dawn
