Vote chhiar hun sawn tura Election Commission of India (ECI) ngen turin NGO Coordination Committee te’n Delhi kal an tum a, hemi atan hian an inbuatsaih mek a, Nilaini hian thu chiang a awm a beiseiawm.
Thu dawn danin, NGO Coordination Committee hi an inrawn kual a, tun kara Delhi kal hi an tum a, pawl panga aiawh theuhte an kal ang. Political party aiawhte an tel dawn lo a, hei hi political party lamin NGO Coordination Committee aiawhte hi kal se a tawk alawm an tih vang a ni tih thu dawn a ni.
NGO Coordination Committee hi Central YMA-in an ho a, YMA, MUP, MHIP, MZP leh MSU te an tel.
Thawhlehni khan Mizoram CEO (Chief Electoral Officer) Mahdup Vyas an hmu a, ani pawh hian anmahni ngei hi kalin ECI hotute hi hmaichhanah bia se tha a tih thu a lo hrilh a ni.
CEO Vyas hian tun hnaiah ECI hotute hi hmaichhanah a bia a, MPF leh political party te’n vote chhiar hun sawn tura ECI an ngenna lehkhate pawh ani hian a hlan chhawng a ni. Mahse ECI hian vote chhiar hun hi sawn an tum lo a, ECI chhanna hi kar hmasa lamah NGO Coordination Committee te a hrilh hnuah Thawhlehni khan hmaichhanah an inbe leh a ni.
NGO Coordination Committee hian Inrinni-a an thutkhawm khan “Inthlan vote chhiar hun sawn a nih theih nan Election Commission of India (ECI) hotute an hmunpui ngeiah sawipui tum a ni. Hei hian awmzia a neih loh chuan Protest Day hman tum a ni bawk,” an lo ti tawh.
An hruaitute chuan Protest Day chungchang an la ngaihtuah loh thu, a hun tur ruahman sa a awm loh thu The Aizawl Post an hrilh a, ECI hotute hmuh phawt a, chumi zawhah a tul anga ngaihtuah a nih tur thu an sawi.
Mizoram inthlan vote chhiar hun tura tih December ni 3 hi Chawlhni a ni a, NGO Coordination Committee chuan Inrinni leh Chawlhni ni lo ni danga sawn turin an ngen a ni.