August ni 27 khan Zarkawtaht Local Council inthlan vote chhiarnaah Covid-19 natna vei nena tun hnaia inhnaiha lo awm mi pakhat a lut a, he hmuna lutte chu inkhung hrang rih tura ngen an ni.
Zarkawt LLTF chuan vote chhiartute zingah Covid-19 natna vei nena in-contact an awm tih Zirtawpni tukah an hriatchhuah thu an sawi a, test result a chhuah hma chu lo inkhung turin he hmuna kalte an ngen.
Zarkawt-a LPS office-a thawk pakhat chu Zirtawpni khan a positive tih hriatchhuah a ni a, ani hi August ni 18-a Zangena Filling Station-a kal a ni a, ni 19-ah office a kal. Zangena Filling Station-a thawk mi pakhat chu 20-ah khan a positive tih hriatchhuah a ni a, LPS-a thawk pawh chu a inkhung hrang nghal tih thu dawn a ni.
A sample endik a ni a, Zirtawpni khan a result hi a chhuak. A lo positive avangin LPS-a thawk mi 24 te chu Zirtawpni khan Rapid Antigen Test hmanga endik an ni a, an negative vek a ni.
LPS-a thawk positive hian ni 20 atangin office a chawl a, office a chawlh bakah Aizawl inkharkhip lai a nih avangin LPS office hian pawn lam mi dawrtu an neih loh lai a ni tih an sawi.
Zirtawpni khan veng thenkhat an inkharkhip a, Aizawl Venglai chu an task force hruaitu mi pathum an positive tih hriat a nih hnuah an inkharkhip. Bawngkawn leh Zemabawk te an inkharkhip bawk a, Khatla pawh tlai dar 3 thleng an inkharkhip.
(THE AIZAWL POST – Tualchhung)
Full>> ePaper Subscribe
