Tun hnai khan Kolasib district-a Mualvumah vote thlak ngai pawimawh tura inzirtirna campaign buatsaih a ni a. Inthlan hnuhnung berah Mualvum chu vote tlak tlem berna zing ami niin 46.42% vote a tla a, hei hi Election Commission lamin ngai pawimawhin vote thlak campaign pawh hi buatsaih a ni.
Kan hma lawkah inthlanpui kan hmachhawn leh dawn a ni a, political party hrang hrangin sawrkarna siam ngei tumin tan an la mup mup a, candidate-te pawhin mipui ngaihzawn tur zawngin thu tha tak tak sawiin kawng hrang hrangin chet an la a, hun leh tha, sum leh pai an insengso nasa em em thin.
Inthlan dawna hetianga beihpui thlak mup mup a nih chhan hi chu ‘mi pakhat vote’ duh vang a ni. Poem pakhata ‘tui mal far te te leh tiauvut hrang hrang tlingkhawm te’n tuipui lian leh ram nuam a siam’ tih ang deuh khan, mi pakhat vote theuh tlingkhawm hian thil a ti thei a, politician-te hian an inchuh ta luai luai a ni ber. Mi hausa leh rethei, hmeltha leh hmelchhia, pumraw lian leh pumraw tê deuh te vote hi a tha bik leh hlu bik awm chuang lovin a intluktlang vek a, chutih laiin vote hlutzawng inangtlang vek si hi, mimalin a hman duh dan azirin danglamna erawh a siam nasa thei hle.
Vote nei thei chin hi chu sawrkar pawhin, duhthlanna thiang tak hmanga thutlukna siam thei tawh, rilru puitling tawh china a ngaihte, an ni a. Hei hi ngun taka kan ngaihtuah a pawimawh hle.
Vote nei thei chinte hi chuan, ka vote hi ‘ka hlutna lantirna, zalen taka ka duhzawng leh duh loh zawng ka thliar ve theihna power a nih avangin keimah chauhvin ka duh ang chiahin ka hmang tur a ni’ tih rilru pua midang thlekna lam apianga thlekpui mai mai lova, mahni chhia leh tha hriatna thiang tak hmanga uluk taka kan hman phawt chuan, Siamtu pawh hian vote hi mal a sawm ang a, ram roreltu mi tha pawh kan thlang ngeiin a rinawm. Kan vote pakhat hlutna tlingkhawm hi sawrkar term khat chhunga kan dinhmun siamtu a ni thin tih hriain mi tin hian kan vote theuh hi thianghlim taka hman i tum teh ang u.
Vote Pakhat
