Lok Sabha inthlanpui a hnai tual tual a, candidate-te pawh thahnemngai takin an campaign mek a. Election commission lam pawh, vote a tlak that theihna turin kawng hrang hrangin a campaign ve mek bawk a. Campaign chhan ber vote neitu mipui lam hi, vote thlak a pawimawhna varpawh lehzual tura zirtirna pek a pawimawh a. Vote thlak ngei tura a huhova intiamna, ‘mass pledge taking’ tunhnaia buatsaih a ni pawh hi, uar zawka kalpui chhunzawm a pawimawh dawn hle. Kum upa, chak lo zawk te, in lama kalchilha vote thlaktir thlengin kalpui a ni ta a. Tunhma Lok Sabha inthlanpui kan lo neih tawh aiin tun tum inthlanah hian vote a tlak that zawk pawh ngei a beiseiawm hle a ni.
Mizote hi aurinna hmang tangkai berte zing ami kan ni hial awm e. Engkim mai deuhthaw hi aurinna hmangin kan inhrilh a, aurinna hmanga thupuan chu kan ngai pawimawh deuh bik zel ni te pawhin a lang. Tunlai thiamna hman tangkai tuma social media Group kaltlanga thu puanzar hi a rangin a awlsam viau nachungin, ‘ka lo en lo a’ tih chhuanlam hi a la tam hle niin a lang a. Aurinna hmanga thu pawimawh puanzar nge nge hi chu kan lo hre kim zawkin kan lo la ngaipawimawh zawk niin a lang.
Inthlan nia chhun dar 12 leh tlai dar 3 inkar vela vote thlaktu an han tlem deuh te pawh hian, aurinna hmanga kan han inkoh hi chuan, polling booth lam panin kan inzui leh duah duah mai a, aurinna hmanga inkoh hi kan duh deuh ni maw!
Tihdan phung dik leh tha inzirtir a, vawng zui tur chuan thawklehkhatah a fel nghal duak thei bik lo. Tunhma ngaihtuah chuan vote thlak pawh mipui lamin kan ngaipawimawh ta hle. Chutih rualin, aurinna hmang kher lova inkoh khawm kan la harsat rih miau chuan, aurinna hi la hman tangkai a ngai tihna a ni mai a. Chuvangin, tun tum Lok Sabha inthlanpui kan hmachhawn mekah pawh hian, vote thlak pawimawhna te leh vote thlak ngei tura inngenna te hi aurinna hmang hian tun atanga kan inhrilh peih a pawimawh dawn hle niin a lang.
Vote thlak leh aurinna…
