Daily Newspaper

Vote thlak zo fel, LC leh VC-ah MNF

33

Aizawl, August 29 :  Local Council (LC) leh Village Council (VC) inthlan, August ni 27-a neihah vote thlak zawh fel a ni a, vote thlak a muan avangin hmun engemaw zatah vote chhiar pawh a tlai.

LC leh VC-ah hian state-a sorkarna chang mektu MNF an chak ber ve ve a, a pahnihah hian INC (Indian National Congress) chu pahnihna ve ve niin, ZPM-in an dawt leh.

Hrilen laia inthlan ni mah se vote a tla chhe lo; veng 59-a LC inthlanah mipa 42519 leh hmeichhia 48407 te’n vote an thlak a, vote tla zawng zawng hi 90926 niin, vote awm zat atanga 60.34% a tla. 2015 inthlanah khan 68.35% a tla. VC-ah mipa 167708 leh hmeichhia 169966 te’n vote an thlak a, vote tla zawng zawng hi 337674 niin, vote awm zat atanga chhutin 75.82% a ni.

Vote hi zing dar 7 atanga tlai dar 5 thlenga thlak tur a ni a, hun tiam chhunga thlak zo hman lo veng leh khua thahnem tak an awm. Danin a phal angin tlai dar 5-a inthlanna hmuna awm hmante chu dar 5 hnu-ah pawh vote thlak phalsak an ni a, hmun thenkhatah chuan zanlai an thleng.

Vote thlak a muan avangin vote chhiar pawh a nghawng a, tlai dar 5 pelha chhiar nghal thei an awm laiin khua leh veng tam zawk chuan vote hi an chhiar tlai nia hriat a ni. Hmun thenkhatah chuan zanlaia chhiar tan thei chauh te an awm a, a tuk zing lama chhiar tan thei chauh te pawh an awm.

Tun tum inthlanah hian vote thi a tam riau mai a, khawpuiah pawh thingtlangah pawh vote thi hi tum dang aiin a tam niin a lang. Aizawl-ah pawh veng pakhatah chuan vote thi 661 a awm.

Khawthlang lama Tuikuk voter awmnaah vote thi a tam tih thu dawn a ni a, ‘arrow cross mark’ an hman dik loh vanga an vote thi ta a awm teuh tih thu dawn a ni.

Hmun thenkhatah chuan vote thih chhan hi a inang deuh thap thap tih thu dawn a ni bawk a, inthlan buaipuitu thenkhat chuan inthurualin an tithi a ni ang tih theih tur a awm tih an sawi. District hmunpui pakhata veng pakhatah chuan hmeichhia an vote loh avanga vote thi anga sawi theih a awm nual; reserved seat-a hmeichhe candidate-te vote lovin, chumi aiah chuan general seat-a mite an vote belh a, chutianga vote thi ta chu tam tham tak a awm tih thu dawn a ni.

“EVM kan lo hmang rei ve tawh a, paper hi kan lo hmang thiam tawh lo te pawh niin a lang,” tiin district election officer pakhat chuan a thlir dan The Aizawl Post a hrilh.

State Election Commission lam chuan inthlan chungchanga lungawi lohna lam complain an dawng lo tih an sawi a, hrilen laiin buaina em em sawi tur awm lova vote thlak a nih avangin Mizoram mipui fakawm an tih thu an sawi.

August ni 28 kha inthlan that ngaite inthlan that ni tur a ni a, mahse inthlan that ngai a awm lo. Thlan tlinte hi September ni 4 thlenga sorkar siam felna hun pek an ni a, September ni 7 chu tun tum inthlana thiltih ngaite tihfel zawh hun tur a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy