Vote thlak zo har
Mizoram inthlanpuiah hmun thenkhatah vote an thlak zo har a, hei vang hian state puma vote tla zat pawh hriat har a ni. Amaherawhchu, tum dangah pawh vote thlak zawh harna hmun hi chu a awm thin.
Vote thlak zo har ber chu Thorang biala Marpara South Polling Station a ni a, zan dar 12 an thleng thelh. Thu dawn pakhatah chuan zan dar 11.50-ah an thlak zo tih a ni.
Vote hi tlai dar 4 thlenga thlak tura tih a ni a, mahse tlai dar 4-a polling area-a awm hmante chuan dar 4 hnuah pawh vote an thlak thei. Hmun hrang hrangah tlai dar 4 hnua vote thlak hi a awm a, Aizawl khawpuiah pawh thim hnua vote thlak an thahnem tham tih thu dawn a ni.
Election department lam chuan khawl lama harsatna a thlen vang a ni tlangpui tih an sawi. EVM chungchangah, a chhia emaw tih, lo chhe si lo a awm nual a, mahse a chhia emaw tih chhungin hun a lo kal hman a, hetiang hian harsatna a thlen tho tih an sawi.
Chief minister Zoramthanga vote thlakna EVM a chhia emaw tih a ni a, phai media lamah pawh tarlan a ni. Hei pawh hi a lo chhe lo a, thil dang zawk a lo ni tih election department lam chuan an sawi.
Hriat theih chinah Lawngtlai East biala Pangkhua-a Farmiangi chu vote thlak zinga upa ber a ni a, kum 115 nia sawi a ni. Aizawl North II biala Ramhlun Vengthar-ah kum 105 mi Biakleti’n vote a thlak a, Champhai South biala Ruantlang-ah Rualhnudawla, kum 101 miin vote a thlak bawk.
Vote thlak zo har
