MLA General Election 2023 neih zawhfel taka bial hrang hranga Post Poll Scrutiny nimina neihah, 20-Aizawl South III (ST) Assembly Constituency huam chhunga awm Muallungthu Polling Station-ah thil felhlel a awm tih hmuhchhuah a nih avangin he Polling Station-ah hian November ni 10-ah ECI thupekin vote thlak that leh a ni dawn a. Vote thlak that a ngaih chhan hi, pawn lam atanga harsatna thlentu a awm vang ni lo, polling official ten an lo tihsual palh vang liau liau niin a lang a, dik lo taka vote tihchingpen (vote rigging) tumna lamhawia han hmehbelna tur chi awmin a lang lo a. Chutih rualin, tisual palh thei mihring kan ni kan tih laiin, tun hnua hetiang thil a thlen tawh lohna tura fimkhur zual phah nana hman tangkai thiam erawh a pawimawh dawn hle niin a lang.
Tun tum vote tlak dan (voter turnout on poll day) han en hian, khawpui lamah aiin thingtlang khaw lamin vote thlak an ngai paiwmawh zawk tih a lang. Vote thlak ni-a vote tlak dan 80.43% a nih laiin, district hrang hranga vote tlak danah, voter tamna heng district – Aizawl, Lunglei, Lawngtlai leh Champhaiah te chuan vote tla hi 80% hnuai lam vek a ni a, a bak zawng district-te hi voter tlemna an ni a, vote tla erawh 80% chung lam vek a ni ve thung.
Chumi awmzia chu, voter turnout pawt hniamtu chu khawpui lam an ni mah zawk a, abikin Aizawl district hian a pawt hniam nasa hle.
Abikin, Aizawl district-ah voter an tam ber a, 2,22,468 an awm a, vote tla chu 77.56% a ni. Chumi awmzia chu vote thlaktu hi 1,72,546 an nih laiin vote thlak lo mi 49,922 an awm tihna a ni. Aizawl district-a vote thlak lo zat hi heng district panga – Saitual, Khawzawl, Champhai, Serchhip leh Siaha tea voter awm zat aiin a tam vek a. Aizawl district-a vote thlak lo zat aia Mamit leh Kolasib district-a voter tam zawkna hi tlemte a ni bawk.
District dang aiin Aizawl district hian vote thlak tura awareness campaign pawh a dawng tha zawk tura ngaih a ni a, entawntlaka awm tur zawk khawpui lam hian tan an lak nasat a ngai hle tih a lang.
Vote tlak dan leh a behawm…
