VUC thu leh hla hi confidential a ni
– K Lalnghinglova
Thenkhatin ZPM party hnuaia Val Upa Council (VUC) chu ngawireng leh hna thawk lo angin sawi thin mah se, hna an thawk reng a; an thu leh hla erawh puanzar chi a nih loh avangin thup (confidential) a ni a, ngawireng hna an thawk zawk tih VUC member K Lalnghinglova chuan a sawi.
Thawhtannia ZPM party office-a inkhawmah VUC member K Lalnghinglova, IAS (Rtd) chuan, Val Upa Council chu ZPM danpuia awm, ZPM ta a ni a, sawrkar khalhngil tur leh kawng dik a zawh zel theihnan a tul anga hma latu tur a ni a tih a sawi. House leader thlan kawngah pawh VUC-in mawh a phur sang hle a, vawiin thlengin VUC leh sawrkar inkarah zep engmah a awm loa, thenkhatin VUC hi ngawireng angin sawi thin mah se, an thu leh hla chu puan chhuah chi loh, confidential a ni a. Ngawirengin hna an thawk reng tih a sawi.
Kum 2000 chho velah Mizoram, Tripura leh Punjab chu sawrkar hnathawk tamna state an ni a. MNF leh Congress hunlaiin sawrkar hna tam tak la in, sawrkar hnathawk lian an la hnem a, a lu lamah an buk luih tih Mizoram sawrkara secretary hlui K Lalnghinglova hian a sawi. Sawrkar tharah chuan hna lak reng reng awmze neiin an kalpui zel dawn tih a sawi a ni.
ZPM chu corruption laka fihlim tura an intiam angin, vawiin thlengin corruption vangin an hruaitute kamkhat ngai an la awm lo tih a sawi a. Thil tha lo hmu reng chunga siamthat hna thawh tum lo leh ngawirenga enliam thei mipui zingah kan awm ang tih chu thil venthawn awm tak a ni, tiin, “Sawrkar kaiza ven kawngah mipuiin tan kan lak a tul hle,” a ti.
Mizorama kan thil tharchhuah chu a hralhna kan hnawng fo thin a, tunah chuan sawrkar intiam angin an hnawng tawh lo tih ZPM hruaitu hian a sawi a. Kuthnathawktute lam tang an nih angin an thutiam an tipuitling chho zel a, thlai thar an lei a, hei ringawt pawh hi ram kaihhruaina kawngah thil danglam a ni tawh tih a sawi a ni.
VUC thu leh hla hi confidential a ni – K Lalnghinglova
