Pathianni zan khan Euro 2024 khel tur zawnna neih chhunzawm a ni a, Wales chuan 2-1 a Croatia hnehin beiseina thar an insiam. Si li faia Andorra sawptu Romania pawh in hmahruaitu Switzerland an lehpel a, an tling chiang teuh tawh viau bawk.
Wales chakpuitu Wilson
Group D-ah pathumnaa awm mek Wales chuan an chunga awm mek Croatia chu Cardiff Stadium-ah an mikhual a. Inkhel pawimawh takah Harry Wilson goal hnih thun hmangin hnehna hlu tak an chang a, pahnihnaah an inhlangkai.
Cardiff Stadium-a inkhel hmuhnawm takah hian mualneitu Wales leh an mikhual Croatia te an inhnehtawk viau a, chawlhlawk hmain goal thun thei an awm lo. Chawlhlawk hmaa goal a luh theih loh hnuin chawlhlawk hnu lamah goal a thun ta thuai thung. Second half tan atanga minute hnihna lekah Harry Wilson chuan hmahruaina goal a thun. Hmahruaina goal an thun hnuin Wales an phur thar viau a, na zawkin an mikhualte an nawr zui nghal zat bawk. Hmahruaina goal thuntu Wilson chuan minute 60-naah an hmahruaina tizau turin an goal hnihna a thun zui leh. Si hnih faia hma an hruai vangin inrintawkna sang zawk nen an inlan zui a, phur viau mah se goal an chhuah tlat thung. Minute 75-naah Mario Pasalic chuan Croatia tan goal a thun a, an si phurh a sut then. An si phurh sut then mah se hun tawp thlengin goal dang an thun belh thei tawh lova, Wales lakah uiawm takin an tlawm zui ta a ni.
An elpui lian Croatia lakah an chak vangin Wales hian khelh ruk atangin point 10 an hmu a, Croatia nen point 10 ve ve hmu mah se chungnung zawkah an tang rih a, group D-ah pahnihna an ni. Group D-ah hian khelh sarih atanga point 16 hmuin Turkey an tling chiang tawh a. Wales leh Croatia in pahnihna an inchuh zui ang a. Pathumna ni tan pawh playoff khelh phak beiseina sang tak a la awm ve bawk.
Euro 2024 khel tura tling chiang turin Turkey hian Pathianni zana an khingpui Latvia chu 4-0 in an hneh. Euro 2024 khel turin inelna thlengtu Germany bakah France, Belgium leh Portugal te an lo tling chiang tawh a. Pathianni zan khan ram pathum; Spain, Scotland leh Turkey te an tling chiang ve leh bawk.
Pathianni zana inkhel dangah Romania chuan an mikhual Andorra chu si li faiin an hneh a, khelh 8 atanga point 16 hmuin an chunga awm Switzerland an lehpel a, Group I hmahruaitu thar an ni a, inelna hmachhawn turin an tling teuh tawh hle.
Wales tan beiseina thar
