Ni hnih chauh lak luh nan hun a awm tawh tihin Inrinni khan Washington DC khawlaiah mi sang tel, a tam zawk hmeichhiate chuan United States president atana thlan, Donald Trump-a duh lohna lantirin kawng an zawh.
People’s March an tih, a hma lama Women’s March an tih hi kum 2017 atang khan kum tin neih thin a ni.
A huaihawttu pawl hrang hrang tanghote chuan hetiang thil an kalpui hi ‘Trumpism’ an duh loh vang niin an website-ah an tar lang a. Trump-a duh lohna hi liantham vak lovin New York City leh khawthlang lam, Seattle-ah pawh lantir a ni bawk.
Amah duh lohna lantir a nih lai vel hi Trump-a’n Thawhtannia a kaihhruai sorkar lak luh tur kaihhnawiha kartawp chhunga tul hrang hrang ti tura an ram khawpui a thlen lai vel chiah a ni.
Inrinnia Washington DC-a People’s March neih hi kum danga an neih thin lakah chuan kalkhawm an tlem hle thung. Huaihawttute chuan mi 50,000 vel an beisei laiin 5,000 chuang awrh chauh a ni.
Mipuite hi park pathuma a hrana an innghah khawm theuh hnuah Lincoln Memorial panin kawng an zawh.
A huaihawttu pawlte chuan an website-a an tar lan dan chuan ‘hnam hrang hrang inpawhna’ an ngaih pawimawh avang leh ‘tun laia khawvelin a buaipui thil hrang’ avanga ti an nih thu an sawi a. Heng zingah hian sik leh sa inthlak te, pem chungchang te leh hmeichhiate dikna chanvo chungchang te a tel.
Washington-a People’s March-a tel hmeichhe hrang hrang pawhin tel chhan hrang hrang an nei bawk.
Pakhat chuan a tel ve chhan chu nau tihtlak phal ni se a duh avanga tel a nih thu a sawi a. Mi dang pakhat chuan chhan hrang hrang avanga tel ve a nih thu a sawi.
People’s March hmasa ber hi kum 2017-a Trump-a’n Democratic presidential nominee Hillary Clinton-i a hneh hnua neih kha a ni a. Hmeichhiaten Trump-a lak luh a nih hmasak zawk tum khan duh lohna lantir an huaihawt a, mi tam tak an tel.
Women’s March hi a hnu kum zelah pawh Trump-a thil kalpui duh dan duh lohna lantirna pakhat atan hman zui zel a ni ta a; mahse, a chang chuan thil dang au chhuahpui chang pawh an nei.
Amah duh lohna an lantir tlaiah hian Trump-a pawhin lak luh tur kaihhnawih thil ti turin Washington DC a thleng ve a. Sorkar thil bakah a mi mal thil tih tur a nei nual a, heng zingah hian Virginia daia a golf club-a halmawi hal pawh a tel.
Duh lotuten kawng an zawh lai hian Inrinni vek khan Trump-a thlawptu mi tam vak lo chu Washington Monument-ah an pung khawm ve tho va. Mi thenkhat chu ‘Make America Great Again’ lukhum parh sen nen an thawk chhuak.
Washington-ah lak luh mai tur Trump-a duh lohna lantir
