Nilaini khan World Water Day a ni a, khawvel hmun dangte ang bawkin Aizawlah pawh he ni hi hman a ni. He huna khuallian Dr R Lalthangliana chuan ramngaw humhalh kawnga tanla turin mipui a sawm.
PHE department leh Central YMA tang dun buatsaihin Vanapa Hall-ah he ni hi hman a ni a, khuallian chuan tuihna humhalh a nih theih nan thing leh mau, ramngawte humhim a ngai tih hriaa tanla turin mipuite a sawm a ni.
Mizoram chu India ram state-te zingah tui harsatna tawk mek leh tawk zel tur nia ngaih zingah a tel tih a sawi a, chuvangin vawiin World Water Day kan hman hi kan state tan a pawimawh lehzual a ni, a ti. Thawhhona tha a pawimawh tih a sawi a, hripui len laia sorkar, kohhran, tlawmngai pawl leh mipui mimir kan tang tlang ang khan, tuihna humhalh kawngah pawh zavaia tan tlan a ngai a ti.
Midangte tih tura dah lova mi tinin kan theihtawp kan chhuah a tul tiin a sawi a, “Kan vei tak tak a, kan beih tak tak chuan kan hlawhtling ngei ngei ang,” a ti.
Harsatna kan tawh hi thawhhona tha siamtu ni se a duh thu a sawi a, hmachhawp tam tak tihlawhtling turin a takin i pen chhuak ang u tiin a sawm a ni.
Central YMA president R Lalngheta pawhin thu a sawi a, Mizoram hmun hrang hrangah tuihna a kam nasa a, a humhalh kawngah tanlak nasat a ngai, a ti.
Group YMA hruaitu kalkhawmte chu anmahni hmun theuhah tanla nasa lehzual turin a chah a, tuihna humhalh chauh ni lo, faina leh thianghlimna kawngah te, ramngaw humhalh kawngah te pawh tanlak nasat a ngai, a ti. Ram siamthat hna hi vei tak taka vei a, tih tak takna nen nasa lehzuala tang tlang turin mipuite a sawm a ni.
PHE department leh Central YMA te hi tuihna humhalh a nih theih nana kum engemaw zat an lo thawkho tawh a, tuihna awm ang angte hi ei leh in atan bakah ram hmasawnna thlen thei tur khawpa duat taka enkawl a, humhalh tumin an thawk a ni.
World Water Day hi UNO puan a ni a, 1992 khan UN General Assembly-in khawvelin tui thianghlim duhkhawp a neih zel theih nana tanlak a nih theih nan March ni 22 hi World Water Day atan a puang a ni. Kumin World Water Day campaign auhla ber chu, tui leh invawn thianghlim kawnga hun khirh lai sut kian zel (solving water and sanitation crisis) tih a ni.
Water Day-ah ramngaw humhim turin mipui sawm
![](https://theaizawlpost.org/wp-content/uploads/tap_logo-min-large.jpg)