Vanlalawmpuia, Lal-dingliana leh F. Zoram-chhana’n WBC India title an chuh dawn a, Mizoramin kawnghren pathum kawl zui turin chak an inring.
Ruahman lawk angin Tata SK 612 LPS Pro Fight Title Fight rualin WBC India Championship inhnek pathum a awm dawn a, zaninah Zotea’n Mumbai boxer Adil Rajesh Kumar Singh hmachhawnin super bantamweight title an inchuh dawn a, profe-ssional huangah amah aia tawnhriat ngah ni mah se Cherhlun tlangvalin chak ngei a inbeisei a ni.
Pro Fight title fight-ah Zotea a vannei lo a, vawi-thum tlawm tawhin title WBC India hnek chhuak turin hun tha a nei mek a, inbuatsaihna a neih that avangin tha taka inlan theih a inbei sang hle a ni.
WBA Asia title chuh tawh Zotea hian profe-ssional boxing tum 10 a khelhna tur chiah a ni bawk a, vawiruk chak tawhin tum thum a tlawm a, a hmaa ding tur Adil Rajesh chuan tum kua hnehna chang tawhin vawi li a tlawm bakah tum hnih a inhneh-tawk tawh a ni.
Zirtawpni zanah tho Tuipui tlangval Dinga’n WBC India bantamweight title a chuh ve thung dawn a, Chennai boxer Pradish A nen an intawng ang. Dinga’n professional vawi-thum a khelh tawhah hneh-na chang vekin Pradish hian tum thum tho khel tawhin tlawm a nei lo a, vawihnih chakin tum khat a inhnehtawk a ni.
Kum 2019 khan a vawikhatna’n Pro Fight-ah Dinga a champion a, hemi hnu hian professional luh-chilhin Pro Fight-ah a tel zui tawh lo a, a zinkawng tluang tawk lo mah se tun tumah hun tha a neih tihlawhtlin ngei a duh a, NTP boxing training centre-ah ngawrh takin a inpuahchah a ni.
Inrinni zanah WBC India super light title in-chuhin Khuangthing fighter Awpa leh Chennai boxer Gugan Kumar an inhnek ve thung dawn a; hnuhma an neih tawhah Mizo tlangval a chungnung zawk a, rin hlawh ni chungin hruihrual chhungah a lut ang.
A tirah Awpa’n Pro Fight light title a kawl mek humhim turin rilru a siam hman a, mahse, WBC India title chuh theihna hun tha a neih leh tak avangin Pro Fight title kalsanin chona thar a hmachhawn dawn a; professional huanga tum 10 a inhnek tawhah vawiruk chakin tum thum a tlawm a, vawikhat a inhnehtawk.
Hetih lai hian Tamil Nadu boxer Gugan-a’n tum thum hnehna chang tawh-in, vawihnih a tlawm a, tum hnih a inhnehtawk a ni.
WBC India title chuh tur Mizo boxer-te inringtawk
