Daily Newspaper

Wembley khelmualah sakeibaknei kha a chih!

20

Hminglema Three Lions an tih mai England chuan Thawhlehni zan World Cup qualifiers pakhat-ah an mikhual Hungary an hneh zo lo a, manager Gareth South-gate chuan an kawtkaia 1-1 draw kha ‘lungchhiatthlak ngawih ngawih’ tiin a sawi.

2022 World Cup khel pha tura dinhmun duhawm taka ding tawh England hian an khelmual pui bera point thum an hmuh zawh loh avangin Group I lamah an hnungtawlh hlek a, khelh riata point 20 neiin an hmahruaina chhunzawm bawk mah se an hnuai chiaha pahnihna luahtu Poland chuan inkhel dangah sikhat faiin mualneitu Albania an hneh a, he group-a a sang pahnih hi khelh hnih la awmah point thum chauha an inthlauh tak avangin automatic-a tlang tur zawk a la chiang lo zui zel.

Wembley inkhel tir lamah hian Hungary fans lamin buaina an chawkchhuak a, tunlaia mihang thlavang hauhna chi khat, inkhel tan dawna thingthit chu England player-te’n an entir laiin chutiang duhlohna chu Hungarian mikhual paw hraw tak takte hian banner siamin an lantir a, England player-te chu an lo aunawmnah bawk a, a hnuah khelmual viltu steward leh police lam nen an intibuai zui ta nghe nghe.

Boruak duhawm lo thunun a nih hnuah Hungary chu goal thun hmasa zawkah tangin, minte 24-na lekah Loic Nego laka hlauhawm khawpa a bawp a khai avangin Luke Shaw chuan penalty a chawi a, Roland Sallai lo penchhuakin England goal-veng Jordan Pickford-a tluklohna lamah goal hmahruai a chhuihlut.

Minute 13 a liam leh tihah Three Lions siphurh hi John Stones chuan sutin, Tyrone Mings leh Declan Rice-te’n Phil Foden-a free-kick chhuih an tawk kual hnua he ‘chance’ hi lo chhuak a ni,

Hei bak hi Hungary lamin si an phurhbelh duh ta lo a, Harry Kane-a khelh that ni a lo ni lo ve lehzel bawk nen England captain hi an thlak ta hial a, chuti chungin mualneitu team hian point thum an zawng zui char char a, an tum an hmu lo.

Chakna goal zawn an beihngawrh lai takin Kane kha hun tawp hma minute 14 la awmah Tammy Abraham chuan thlak mah se England striker khan sawiselna tur a neih a rinawm loh a, a khelh dan thin a pha lo a, inrintawkna pawh a vawngnung hlei thei lo a, thlak kha coach tihawm tak a nih rualin an captain chhuak khan game a siamtha zo ta chuang lo.

Tun kha a zawna game 15 chhung goal a thun mar tluan hnu September 2017 atanga England captain-in qualifier-a goal a khung zawh loh vawikhatna niin, nidanga a khelh dan pha lo ti bawk mah ila, a chunga tarlan tak ang hian, hun rei tak England hmatawng hriam ver vawr ni chunga a inlan tawh avangin ani ang level atan chuan a tha tawk lo tih mai a ni.

Khelmual a chhuahsan hma lawka goal thun theihna hun remchang a bawhpelh hnuin Raheem Sterling-a tan ball tha a chhawpsak bawk.

Wembley game-ah khan Manchester City player panga ngawtin England starting line-up an luah a, an zinga pakhat Sterling pawh chu a chetfuh zawh bik loh avangin kane-a rualin thlak ve nghal a ni.

Southgate chuan an khelh dan thin pangngai level an pha lo tih sawi chungin Hungary lamin tlarhnung an veng tha ve tlat tih a sawi a, hnehna chang turin an khel chhuak thei lo tih a pawm.

England coach chuan nikum September thlaah nuamsa tak (4-0)-a Hungary hi an lo hneh tawh avangin khami tum aia game awlsam zawk an beisei tih a tarlang tel a, chutih laiin kumin nipui tluanin an mikhualte kha tlarhnung lamah an chetha ve reng reng niin a sawi.

England tan Qatar pan theihna kawng a la inhawng zau reng a, mahse, Hungary laka hun tam zawk dul hnaka an khelh avangin qualifier hmawrbawk hnaih lama an khawsak dan erawh kha chu English fans tan lawm viauna tur chhan a awm lo ang!

England hian an group atanga tlang nghal turin Albania an mi-khual tur leh San Marin khelmual an luh hunah belhkhawmin point li an la mamawh.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy