Daily Newspaper

West Ham in last 16 an lut

13

Ninga zan khan UEFA Europa League group stage khelh chhunzawm a ni a. Premier League club West Ham United chuan an chetthat an chhunzawm zel a, khualmualah si hnih faiin hnehna an chang. Khualmualah si hnih faia Rapid Viena hnehtu West Ham United hian last 16 an lut chiang nghal. Hammers an tlin chian tawh lai hian Scottish Premiership club lian Celtic erawh chu an tla ve thung.

West Ham kal tluang
London club West Ham United hi David Moyes hnuaiah an chetha chho viau a, English Premier League-ah top 4 huang an luah mek. Europe khawmuala inelna lian Europa League lamah pawh an chetha zui hle bawk a. Khelh 5 atanga point 13 hmuin Group H-ah hmahruaitu an ni a. Group champion an ni chiang der tawh. 20210-22 season atangin Europa League kalphung tih danglam hret a ni a; Group champion ten direct in Last 16 an lut zel tawh a. Group hrang hranga pahnihna te theuh leh Champions League group hrang hranga pathumna te last 32-ah an inel chhunzawm ang a, last 16 luh an inchuh hlawm ang. Dan thar hman a nih tak vangin Hammers hian Last 16 an lut chiang ta a ni.

Season kal meka chetha tak West Ham hi Austria rama inkhelah entu awm lo mahse an chetha zui leh viau. Minute 39-naah Nikola Vlasic cross atangin Andriy Yarmolenko chuan hmahruaina goal a thun. Goal thun hmasa zawk an nih vangin inrintawkna sang zawk nen an inlan chhunzawm a. Chawlhlawk hmain goal dang an thun belh zui leh.

Chawlhlawk dawn tep-ah Rapid Vienna captain Maximilian Hofmann chuan box chhungah Yarmo-lenko titluin penalty a chawi. He penalty hi Hammers captain Mark Noble chuan top corner-ah chiang zetin a pet goal a, an hmahruaina a tizau a, si hnih faia hmahruai chungin chawlhlawk an hmang.

Chawlhlawk hnu lamah mualneitu Rapid Vienna lamin goal thun ngei tumin thapui an thawh a, hlauhawm siamchhuak zauh zauh mahse goal erawh an thun thei lo tluan. West Ham in goal thun belh tuma nawr buan buan aiin an goal neih venhim an ngai pawimawh a, hun tawp thlengin an chesual lo. An phu ang ngeiin khualmualah point thum hlutak an hlawhchhuak a, group champion an nih phah ta a ni.

An mualah an tlawm vangin Rapid Vienna tan last 32 tak ngial pawh luhna chance a awm tawh lova, table mawngphah an ni zui zel. Group H atang hian point 7 hmu tawh Dinamo Zagreb leh point 5 hmu mek Racing Genk ten last 32 luh an inchuh chhunzawm ang.

West Ham United hi kum 1965 khan European Cup Winners’ Cup-ah an lo champion tawh a, Kum 1976 khan final-ah an vanduai thung. Tun season hi kum 1981 hnu lama European Competion-a an chetthat leh ber tum a ni.

Celtic an tla
Ninga zana Europa League inkhel dangah German club Bayer Leverkusen chuan Scottish club lian Celtic an mikhual a, 3-2 in an chak. Leverkusen hian Europa League-ah an muala tlawm lo rei record an siam a. An mualah khelh 15 chhung zet tlawm an nei tawh lo.

Khualmualah Celtic hi an che chhe lem lo viau a, chawlhlawk hnu lamah hmahruai zawkah tang hman zet mahse, hun tawp dawn tepah chesual in, goal hnih an chhuah zawn a, chu chuan an beiseina a tihthlawnsak ta hlauh thung.

German club Bayer Leverkusen hian an mualah bul an tan tha a, minute 16-naah Robert Andrich chuan hmahruaina goal a thun. Chawlhlawk dawn hnaih minute 40-naah Celtic in penalty an hmuh chu Josip Juranovic chuan a pet goal a, an si phurh a sut. Second half tantirh minute 56-naah Neves Filipe chuan Celtic hmahruai letna goal a thun a, hun rei tak hma an hruai.

Hun tawp dawn tep minute 82-naah Robert Andrich chuan an goal hnihna thunin an si phurh a sut nawlh a. Minute nga hnu lekah Moussa Diaby chuan hma an hruai letna goal a thun zui leh ta mai a, Celtic beiseina zawng zawng an tithlawn zui ta a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy