Whitney Houston ‘The Bodyguard’-in RIAA 19x Multi-Platinum a kai

Whitney Houston ‘The Bodyguard’-in RIAA 19x Multi-Platinum a kai
1992 film ‘The Bodyguard’ soundtrack chuan RIAA (Recording Industry Association of America) top-certified film soundtrack a nihna a sawhnghet leh ta sauh a, niminpiah khan RIAA 19x Multi-Platinum a kai ta.
RIAA certification hi US-a hla an hralh tam atanga tehin pek thin a ni a, 5,00,000 hralh tlin theih te chu Gold an ti a, maktaduai hralh tlin theih chu Platinum an ti a, maktaduai 10 hralh theih chin chu Diamond an ti bawk.
‘The Bodyguard’ hi US-ah maktaduai 19 an hralh tling ta tih June ni 25 khan RIAA-in a puang a, 19x Platinum certification a nei ta a ni. He album hi maktaduai khat an hralh belh leh theih chuan 2x Diamond a kai tawh dawn a ni.
‘The Bodyguard’ hi soundtrack album-ah chuan US-a hralh hnem ber a la ni a, Diamond certification nei thei soundtrack album dang paruk a awm a- Bee Gees-led Saturday Night Fever (maktaduai 16), Durty Dancing (maktaduai 14), Prince & the Revolution ‘Purple Rain’ (maktaduai 13), Forrest Gump (maktaduai 12), Titanic (maktaduai 11) leh The Lion King (maktaduai 10) te an ni.
Houston hian RIAA record dang pawh a siam a, mihang zaithiam zinga Diamond (US-a maktaduai 10 hralh tlin theih) album ngah ber niin, pathum a nei a. 1985-a a debut album ‘Whitney Houston’ chu 14x platinum a kai tawh a, 1987-a a tlangzarh a album pahnihna ‘Whitney’ pawh Diamond (10x platinum) a kai tawh bawk.
Mihang zaithiam dang pathum- Michael Jackson, Mariah Carey leh 2Pac ten Diamond album pahnih theuh an nei tawh bawk.
Houston hi singles lamah pawh RIAA multi-platinum certified hla nei tam pawl ni tawhin, ‘I Will Always Love You’ chuan Diamond kaiin, maktaduai 11 (11x platinum) an hralh tling tawh a; “I Wanna Dance With Somebody (Who Loves Me)” (8x Platinum); “I Have Nothing” (4x Platinum), “Higher Love” leh “How Will I Know” (3x Platinum ve ve); “Heartbreak Hotel,” “My Love Is Your Love” leh “Saving All My Love for You” (2x Platinum theuh); bakah “Run to You” leh “Count on Me” (Platinum ve ve) a kai tawh bawk.
‘I Will Always Love You,’ ‘I Have Nothing,’ leh ‘Run to You’ te hi The Bodyguard album ami vek niin, ‘I Wanna Dance With Somebody’ hi a album pahnihna ‘Whitney’ ami a ni ve thung a, he hla hi Billboard-in 2023 khan ‘The 500 Best Pop Songs: Staff List’ No.1-ah a lo thlang tawh bawk.