Wholesale market sakna tur en
Sawrkarin vegetable wholesale market sak a tum zinga pakhat, Sihphir Venghlun ami chu Ningani zing khan minister pahnih – Lalthansanga leh PC Vanlalruata ten a hmunah an enfiah.
Agriculture minister PC Vanlalruata chuan, ZPM sawrkarin a aupui thin leh a ngaihpawihmawh kuthnathawktute tan kawl a eng chho zel a, Aizawl dai hnai hmun li-ah Vegetable Wholesale Market an sa thei tur chu thil lawmawm tak a ni tih a sawi. A building a lian tha dawn a, a hmunhma thlan kawngah sawrkar a fimkhur hle tih a sawi bawk.
“Building hi sak zawh a nih hunah a khaw neituten society tha tak dinin an enkawl zui dawn a, society hian building chhungah kuthnathawktute mamawh tur – thlai chi, hlo tur, pipe, leitha an zuar dawn a. Society hian engkim an buaipui zui dawn avangin khawtlangin a hlawkpuina tur tam tak a awm dawn a, society changtlung leh nung tha kan neih a tul dawn a ni,” a ti.
Aizawl East-I bialtu MLA, minister Lalthansanga pawhin minister leh MLA ten mahni bial an hmangaih tlang a, hmasawnna hnathawhna tur pawh an bialah theuh pawhluh an tum a. Ani pawhin a bial tan theihtawp a chhuah a, a bial chhung, hun rei tawh tak atanga thlai thar hmanga Aizawl khawpui chawmtu khuaah thlai thar hralhna hmunpui a awm dawn ta chu a lawm hle tih a sawi.
Vegetable Wholesale Market sakna tur hi Sihphir Venghlun field bulah a ni a, khawtlangin a sakna tur ram a thlawnin a pe a ni.
Wholesale market sakna tur en
