Pathianni khan palian huanga World Champion hlui Deontay Wilder chuan London Arena-a a khingpui Derek Chisora a hneh. Chisora a hneh hnuin Wilder hian Briton boxer lar, World champion hlui Anthony Joshua chu inhnekpuiah sawmin a chon.
Deontay Wilder hian Derek Chisora a hneh hnuin a thian hnai Chisora Support ring bul lawka hun lo hmang thin Anthony Joshua chu a cho a. Inhnekpui a chak zet tak zet thu leh Joshua nena inhnek turin a inpeih at reng a, thawhphan reng reng a neih loh tur thu a sawi. A cho thu a chhakchhuak lai hian Joshua chuan a hlau a, a tlanchhiatsan thin thu a sawi tel bawk. “Mipa i nih a, min hmachhawn ngam vete a nih chuan tlanchhe reng lovin rawn penchhuak rawh. Ring chhungah ngei boxing ka lo zirtir hlak ang che”, a ti.
Tum hnih palian huanga khawvel champion lo ni tawh Anthony Joshua hian December ni 29, 2025 khan Nigeria lamah car accident a tawk a. A chuanpui Sina Ghami leh Latif ‘Latz’ Ayodele te boral bawk mah se vanneihthlak takin ani erawh hi chu a him hlauh. Chetsualna a tawh hian a rilru lam a nghawng rei viau a, inhnek chawlhsam maite a rilruk hman rum rum hial niin tarlan a ni. A hliam a dam a, a rilru lam pawh a in fit chho ve zel bawk a, inhnek turin a inpeih thawkhat tawha ngaih a ni.
Joshua hian inhnek a hmachhawn hnuhnung ber chu December 19, 2025 kha a ni a, a khingpui Jake Paul chu sixth round-ah a knock-out. Inhnek vawi 33 hmachhawn tawhin vawi 29 a chak a, tlawm zawkah a tang tawh. Deontay Wilder-a’n cho viau bawk mah se hmachhawn a chak ber chu Tyson Fury a ni tlat thung.
Palian huanga boxer tha bera ngaih ni thin Tyson Fury hi Ukranian boxer Oleksandr Usyk lakah a tlawm zawn vangin boxing a chawlhsan. Boxing a chawlhsan hman renrawn hnuin ring chhungah inhnek siah siah turin kir leh a duh a,April ni 11, 2026 hian UK-ah Arslanbek Makhmudov nen an inhmachhawn dawn. Makhmudov lakah a chak a nih chuan Anthony Joshua emaw, Usyk emaw zawk zawk hmachhawn theihna hun remchang a nei leh dawn.
Anthony Joshua promoter Eddie Hearn chuan chotu nei thar bawk mah se Tyson Fury hmachhawn tura an insawrbing thu DAZN a hrilh. “Zep lohah chuan hmachhawn kan duh ber chu Tyson Fury a ni”, a ti. British boxer lar pahnih Tyso Fury leh Anthony Joshua te hi inhnek turin chotuah an lo ni fo tawh. An inhnek ve tawh tak tak dawn emaw tih hnuin an indawrna a tlawlh leh mai thin a, ring chhungah an intawng tak tak thei lo. An uaithlak tawh lamah an intawng nawlh a nih pawhin an inhnekin ngaihven a hlawh hle tho tura ngaih a ni.
Wilder-a’n Anthony Joshua a cho
